Blog

مجھ میں ہی ہے رنگوں کی کمی
قسط 3

صبح وہ حقیقتا یونیورسٹی میں ماہا کو ڈھونڈتی پھری تھی۔ جانے کہاں غائب تھی۔ بے دلی سے پیریڈز اٹنیڈ کرنے کے بعد وہ خاصے خراب موڈ میں گھر واپس آرہی تھی جب ماہا کی کال آئی۔ فورا سڑک کنارے بائک روک کر اس نے فون اٹھا لیا۔ 

کہاں ہو صبح سے فون کر رہا ہوں اگر آج یونی نہیں آنا تھا تو بتا تو دیتیں میں بھی نہ آتا

ہائے میرا جانو اداس ہو گیا میرے بن۔ ماہا آگے سے یوں کھلکھلائی جیسے وہ کوئی رام کہانی سنارہی ہو۔

یار قسم سے یونیورسٹی آئی تھی مگر یہ عادل کے بچے نے اغوا کر لیا مجھے۔ موبائل تک بند کروادیا۔ یہاں مونال لا کر سرپرائز دیا ہے اپنی ہی سالگرہ کا مجھے۔ اف اتنا بے ایمان موسم ہو رہا ہے۔ 

وہ خوش تھی بے تحاشہ خوش اسکی آواز سے جھلک رہا تھا۔

اچھا بس بھی کرو کھانا ٹھنڈا ہو رہا ہے۔۔ عادل کی آواز آئی تھی

میں بھی آتا ہوں۔ 

اس نے کہا توماہا آگے سے خو ش ہوگئ

یہ صحیح رہے گا تم بھی آجائو ابھی ۔ 

وہ جانے کیا کہنے جا رہی تھی کہ عادل ڈپٹ کر بولا

پاگل تو نہیں ہو وہ کیسے مونال آئے گی بائک پر اوپر سے بارش ہونے والی ہے کتنی تو پھسلن ہو جاتی ہے سڑک پر۔ 

میں آرہا ہوں میرا انتظار کرنا۔ 

اسے عادل کا کہنا چیلنج سا لگا سو ضدی انداز میں بولی

نہیں جانو عادل صحیح کہہ رہا ہے ۔ ماہا ڈر گئ تھی۔ عادل بھی دانت پیس رہا تھا۔ 

ہم پھر کسی دن آئیں گے مل کے۔خفا نہ ہونا میری جان آج وہسے بھی عادل کی سالگرہ یہ ہمارے ساتھ کباب میں ہڈی بنا رہے گا کسی دن ہم دونوں بائک پر آئیں گے بس ہم دونوں۔ 

ماہا مسکا لگا رہی تھی مگر مزنہ کے دل کو جیسے ٹھنڈ سی پڑی۔ 

یہ ٹھیک ہے کسی دن۔ اس نے کہنا چاہا مگر ماہا نے عجلت میں بات کاٹ دی۔ 

اچھا میرے جانو غصہ نہ کرنا کل ملتے ہیں اپنا خیال رکھنا با بائے۔ موا۔ 

اس نے فلائنگ کس بھیج کر فون بند کر دیا۔ 

اس نے سر جھٹک کر فون بند کرکے جیب میں ڈالا بائک کوکک لگا کر دوبارہ اسٹارٹ کرنا چاہا تو کچھ فاصلے

پرکھڑے ان دو لڑکوں پر نظر پڑی جو اسے عجوبہ روزگار 

سمجھ کر ویڈیو بنا رہے تھے اسکو اپنی طرف متو جہ ہوتے دیکھ کر چونکے پھر تیزی سے بھاگ بھی اٹھے وہ بس گھور کر رہ گئ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گھر حسب معمول وہ چار بجے کے قریب پہنچی تھی مگر عام دنوں کے برعکس کافی چہل پہل تھی گھرمیں۔کنزی اور امی کچن میں لگے ہوئے تھے حفصہ لائونج کے کونے میں لگے استری اسٹینڈ پر کپڑے استری کر رہی تھی

خیریت ایک ہی ہفتےمیں دو چکر۔ عامر بھائی سے طلاق لینے کا تو ارادہ نہیں۔ 

قریب جا کر اس نےزور سے ہنستے ہوئے کہا تو حفصہ نے بنا لحاظ دو ہتھڑ لگا دیئے

سوچ سمجھ کے بولا کرو کچھ بھی بول دیتی ہو۔برا لگ رہا ہے بہن کا آنا۔ 

اس نےمصنوعی خفگی جتائی۔

برا تو نہیں البتہ حیران کن لگ رہا ہے۔ وہ صاف گوئی سے بولی۔ 

آپی ڈرائینگ روم کی اچھی طرح جھاڑ پونچھ کر دی ہے اور رول بھی بنا دیئے اور کوئی کام کرنا ہے تو وہ بھی بتا دیں۔

کنزی مصروف سی دوپٹے سے ہاتھ پونچھتی اسکے پاس چلی آئی۔ 

خیریت کوئی آرہا ہے کیا ؟

مزنہ کوتجسس ہوا۔

حفصہ مسکرا دی پیار سے تھوڑی  چھو کر بولی

ہاں ایک نہایت اچھی سی خاتوں آرہی ہیں تمہیں دیکھنے۔

کیوں دیکھنے آرہی ہیں مجھے ؟ مجھ پر ٹکٹ لگ گیا ہے کیا؟ کوئی فلم ہوں میں کیا۔ 

وہ جانے سمجھی نہیں یا جان کے انجان بن گئ

 فلم نہیں تم تو ڈرامہ ہو مزنہ وہ بھی ہارر۔

کنزی اپنی سابقہ ناراضگیاں بھلا کر شرارت سے بولی۔مزنہ کے ماتھے پر بل پڑگئے تو حفصہ نے بات کا اثر ذائل کرنے کو کنزی کو ڈانٹ دیا

بری بات کنزی بڑی بہن ہے تمیز سے بات کیا کرو۔ 

آستین پر استری پھیر کر نیا نکور کاٹن کا جوڑا تھما کر بولی

یہ لو جائو نہا کر یہ جوڑا پہن لو۔

مزنہ بدک گئ

میں کیوں یہ پہن لوں یہ آپکا ہے اور میں ویسےبھی ایسے کپڑے نہیں پہنتا پتہ ہے آپکو یہ بات۔

اسکے صاف انکار نے بھئ حفصہ کو بد دل نہ کیا۔ پچکار کے بولی

بیٹا مہمان آرہے ہیں انکے سامنے سب ہی اچھا سا حلیہ بنا کر جاتے ہیں کنزی امی اور  میں نے بھی کپڑے بدلے ہیں تم بھی بدل لو ویسے بھی وہ تمہیں دیکھنے آرہی ہیں۔

حفصہ نے اپنی طرف سے سبھائو سے بات کی مگر وہ پٹھے پر ہاتھ بھی دھرنے نہ دے رہی تھی

میں نہیں پہن رہا یہ کپڑے اور انہوں نے مجھے دیکھنا ہے تو ایسے ہی دیکھیں میں ان کپڑوں میں بھی دکھائی دے رہا ہوں غائب نہیں ہوگیا۔

مزنہ بگڑکر بولی توکنزی ہنس دی

آپکو ایسے دیکھ کر انکو دلہا نظر آئے گا جبکہ انکو اپنے بیٹے کیلئے دلہا نہیں دلہن درکار ہے۔ میری بہنیا بنے گی دلہنیا سمجھیں مزنہ بی بی

اسکے مزاحیہ انداز پر حفصہ بھی ہنس پڑی۔مزنہ نے جھلا کر کپڑے زمین پر پھینک دییئے

یہ کیا مزاق چل رہا ہےمجھے نہیں پہننے یہ کپڑے

کیوں بھئ؟ اسکے رویئے نے حفصہ کو ٹھٹکا دیا سنجیدہ سی۔ہوگئی۔ بڑی بہن والا رعب ڈال کر ڈپٹ کر بولی

کیوں نہیں پہن رہیں یہ کپڑے۔۔خبردار جو اس حلیئے میں انکے سامنے آئیں۔جائو کپڑے بدلو اور کنزی اسکا تھوڑا میک اپ بھی کردینا۔ 

مگر آپی میں یہ سب نہیں کرتا۔اس نے احتجاج کرنا چاہا جسے وہ خاطرمیں نہ لائی

مگر اب کرو۔تھوڑا سجنا سنورنا شروع کرو۔تھوڑی لڑکیوں والی حرکتیں بھی کر لیا کرو۔۔

وہ سمجھانے والے انداز میں بولی جوابا ایکدم مزنہ چلا اٹھی

میں لڑکی نہیں ہوں۔۔۔ 

حفصہ ایکدم چپ ہو کر دیکھنے لگی تبھی داخلی دروازے پر دستک ہوئی۔ امی جو مزنہ کے چلانے پر کچن سے نکل آئی تھیں جلدی سے دروازہ کھولنے لگیں۔ واقعی مہمان خاتون ہی تھیں۔

دو منٹ میں کپڑے بدل کر آئو۔ حفصہ نے گھور کر سخت لہجےمیں کہا تو وہ پیر پٹختی اندر بڑھ گئ۔۔۔۔۔۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چائےکا پرتکلف دور چلا۔ رول سموسے کباب اور پیٹیز۔  کنزی کے ہاتھ کی مزیدار چائے بیگم اصفہانی نے خوب تعریفیں کرکرکے انصاف کیا۔ صفیہ کو بھی بیگم اصفہانی فورا پسند آگئیں۔گوری سی پروقار انداز گفتگو خوش لباس خاتون انکے ڈرائنگ روم میں بیٹھ کر نظر گھما گھما کر گھر کا جائزہ لینے کی بجائے انکی مکمل توجہ کا مرکز صفیہ اور حفصہ ہی تھیں۔ ادھر ادھر کی باتیں کرکے سیدھا مدعے پرچلی آئیں

میری بڑی بہو نے آپکی بہت تعریف کی بتا رہی تھی کیسے آپ نے بیوگی اور اکلوتے بیٹے کی موت کا صدمہ جھیلا پھر بھی ہمت نہیں ہاری۔

امی انکساری سے مسکرا دیں۔

بس برا وقت تھا گزر گیا۔شکر ہے خدا کا بیٹیاں سعادت مند اور نیک ہیں میری۔حفصہ کی تو پانچ سال پہلے شادی کردی۔تھی اب مزنہ کی باری ہےما شا اللہ سے میری بیٹی بہت کام کاجو ہے باہرکا سب کام  دکانوں کا حساب

وہ سادگی سے کہے جا رہی تھیں حفصہ نے سٹپٹا کر ماں کو گھورا تو جملہ ادھورا چھوڑ گئیں

بیگم اصفہانی بھی شائد بال کی۔کھال نکالنے کی عادی نہ تھیں مسکرا کر بولیں

اچھا ما شا اللہ گھر بیٹی نے سنبھال رکھا ہے؟ظاہر ہے حفصہ تو اب مہمان ہے اس گھر میں۔کنزی تو پڑھائی میں مصروف ہوتی ہوگی۔ 

امی گڑبڑا گئیں

جی جی ۔۔ آپ چائےلیجئے۔ 

چائے تو بہت مزے کی ہے۔ گھونٹ بھر کر وہ ہنس دیں

میرا بیٹا ماشا اللہ سے بہت خوش خوراک ہے صاف بات کروں گی بہن۔ کہتا ہے امی شکل وکل سے مجھے سروکار نہیں بس کھانا لذیذ بناتی ہو ۔۔ سچ بتائوں آپکے یہاں ایک ایک چیز میں ذائقہ ہے اور یہ جان کے تو بہت خوشی ہوئی کہ بچی کام کاجو ہے سب گھر سنبھال رکھا ہے۔

امی نے حفصہ کی شکل دیکھی اس نے اشارے سے انہیں دھیرج رکھنے کا اشارہ کیا۔

یہ آپکی بیٹی ہے؟

انکی خود ہی دروازے کی اوٹ میں کھڑی مزنہ پر نگاہ پڑی تو پوچھ لیا۔ حفصہ اور صفیہ نے بھی مڑکر دیکھا تو حیران رہ گئئیں۔ہر وقت اوٹ پٹانگ حلیہ بنائے رکھنے کی وجہ سے اندازہ نہ ہوا مگر اس وقت بڑی بڑی آنکھوں میں کاجل ہونٹوں پر گلابی لپ اسٹک گلابی ہی سوٹ میں دراز قد مزنہ بے حد حسین لگ رہی تھی۔ 

خاتون بھی ایک ٹک دیکھتی رہ گئیں۔ 

ما شا اللہ ادھر آئو بیٹا۔ بڑی تعریفیں سنی ہیں بھئ تمہاری۔ بہت سگھڑ ہو بھئ بچیاں تو کام کرتی ہی اچھی لگتی ہیں۔ 

وہ پیار سے یونہی بات برائے بات کہہ رہی تھیں مگر مزنہ کے تو جیسے تلوے سے لگی سر پر بجھی

دو قدم اندر آکر انکے پاس جانے کی بجائے وہیں تن کر کھڑی ہوکر بولی

کیوں بیٹیاں نوکرانیاں ہوتی ہیں؟جو کام کرکے اچھی لگتی ہیں آپکو یا بہو کے روپ میں کام والی چاہیئے آپکو۔

اسکے تند و تیز لہجے پر وہ خاتون گھبرا سی گئیں

نہیں وہ۔میرا مطلب

حفصہ گھبرا کر اٹھ کھڑی ہوئی

مزنہ کیا بدتمیزی ہے یہ۔

نہیں تو اور کیا فخر سے کہہ رہیں کہ بیٹا خوش خوراک ہے۔ انکو اپنے پیٹو بیٹے کیلئے روٹیاں تھوپنے والی نوکرانی درکار ہے

خاتون کا رنگ ہتک سے سرخ ہوگیا امی نے ڈپٹا

مزنہ چپ کرجائو

یہ کیا بدتمیزئ ہے آپ لوگ یوں گھر بلا کر مہمانوں کو بے عزت کرتے ہیں ۔بہت منہ زور بیٹی ہے آپکی۔

بیگم اصفہانی سب مروت لحاظ بالائے طاق رکھ کر گرجیں

بیٹی نہیں بیٹا ہوں میں انکا بیٹا۔ اور گھر میں گھس کر چائے پانی نہیں کرتا باہر کے سب کام سنبھالتا ہوں۔

اسکے بولنے پر خاتون بولنا بھول کر حیرت زدہ رہ گئیں

یہ یہ کیسے بول۔رہی ہے

حفصہ اسکو بازو سے پکڑ کر باہر لے جانے لگی مگر وہ اسے ہلا بھی نہ پائی

ایسے ہی بولتا ہوں میں ۔اگر آپکو اپنے پیٹو بیٹے کیلئے دلہا درکار ہے تو یہاں بیٹھیں ورنہ چلتی پھرتی نظرآئیں

اتنی منہ زوری بد زبانی مہمان خاتون تو گنگ ہوگئیں البتہ امی نےبلا۔لحاظ اسکے منہ پر تھپڑ دے مارا

بند کرو بکواس یہ تربیت دی ہے میں نے تمہیں۔ 

امی کی غیض و غضب سے آواز پھٹ سی گئ۔ کنزی ہنگامہ سن کر بھاگی آئی بیگم اصفہانی تنفر سے انہیں دیکھتی باہر نکل گئیں۔

حفصہ کے روکنے پر بھی نہ رکیں 

 کیا ہوا امی۔ کنزی نے آگے بڑھ کر تھر تھر کانپتی ماں کو سہارا دیا

پاگل ہو گئ ہو کیا تم یہ کیا حرکت کی ہے تم نے۔حفصہ نے پلٹ کر اسے جھنجھوڑ دیا

ہاں ہاں میں پاگل ہوگیا ہوں۔ماں کے تھپڑ نے مزنہ پر جو سکتہ طاری کیا تھا وہ حفصہ کے جھنجھوڑ ڈالنے پر ٹوٹ گیا۔حلق کے بل چلا اٹھی

اپنے کاموں کیلئے تم سب نے مجھے پاگل بنایا ہےمیں خود ایسا نہیں بناتم لوگوں کے کام کرتے کرتے بن گیا ہوں میں اب

کام کام کی کیا رٹنی لگا رکھی ہے تم نے؟ 

امی بگڑ کر بولیں

باہر کے دو چار کام کرلینے سے تم خود کو لڑکا ہی سمجھنے لگ گئ ہو واقعی بہت ڈھیل دے دی ہے میں نے تمہیں ۔ کتنا بے عزت کرایا ہے ماں کو آج تم نے؟ایسی بد لحاظ اور نافرمان۔۔۔

کیا نافرمانی کی ہے میں نے۔بیٹوں کی طرح گھر کا بوجھ اٹھایا ہے ہمیشہ خود دوڑدھوپ کی کبھی آپ سب پر آنچ نہ آنے دی۔منٹ منٹ پرباہر کے چکر لگائے ہر کام بیٹے کی طرح کیا کبھی بیٹے کی کمی محسوس نہ ہونے دی اب میں آپکا بیٹا ہی بن چکا ہوں بھول جائیں میں لڑکی پیدا ہوئی تھی 

وہ گرج رہی تھی۔بھاری آواز مضبوط انداز وہ تینوں ششدر سی اسے دیکھتی رہ گئیں۔

یہی یہی سب میں آپکو بتا رہی تھی مگر میری کوئی سنتا نہیں۔کنزی بولی تو حفصہ اسے دیکھ کر رہ۔گئ

امی کے ہاتھ پائوں بے دم سے ہونے لگے۔ حفصہ آنکو سہارا دے کر بٹھانے لگی۔

میں کیا کروں میری تو کچھ سمجھ نہیں آرہا۔ امی رو ہی دیں۔۔۔۔۔۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 اپنی طرف سے تو اس نے داد چاہنے والے انداز میں ماہا کو اپنا کارنامہ سنایا تھا مگر اسکے ہر اچھے برے فعل میں اسکا کندھا تھپتھپانے والی ماہا کا ردعمل بالکل غیر متوقع تھا۔ وہ اس پر چلا اٹھی تھی۔ یونیورسٹی کے گرائونڈ میں بیٹھ کر سموسمہ اڑاتے اس نے ہنس ہنس کر قصہ سنایا مگر ماہا ہنسنے کی۔بجائےاسے یوں دیکھنے لگی جیسے اسکے سر پر سینگ نکل آئے ہوں۔

پاگل تو نہیں ہو گئ ہو؟ کیا ضرورت تھی تمہیں ان خاتون سے اتنی بد تمیزی کرنے کی کوئی اندازہ ہے تمہیں وہ کتنا بدنام کر سکتی ہیں تمہیں؟ لوگ تو دشمنی پر اتر آتے ہیں احمق۔ اگر لڑکا پسند نہیں تھا تو بعد میں حفصہ آپی سے بات کر لیتیں آنٹی کو منا لیتے میں آنٹی سے بات کرتی

میں  نے کونسا دیکھا تھا لڑکا۔ اس نے اطمینان سے کندھے اچکائے

پھر اتنی بدتمیزی کی وجہ۔جتنا میں جانتی ہوں آنٹی تمہاری پسند ناپسند کو اہمیت ضرور دیں گی۔انکے دل میں تمہاری الگ ہی جگہ ہے۔ بجائے اسکے کہ تم ان کو اپنی پسند نا پسند بتائو تم نے ایک غیر خاتون کے سامنے انکو شرمندہ کروادیا۔ انہوں نے ایک تھپڑ مارا میری اماں تو ڈنڈے سے پٹائی کرتیں میری اگر میں نے یہ حرکت کی ہوتی تو۔ 

سموسے کو چٹنی میں بھگوتے وہ صاف گوئی سے کہہ رہی تھی

لڑکیاں اتنی ہی مجبور ہوتی ہیں۔ مزنہ کو اس پر ترس آگیا

ہاں تم تو جیسے لڑکا ہو نا۔بی بی ہو تم بھی لڑکی ہی۔ہونی تمہاری بھی شادی ہی ہے۔ ابھی بائک اڑا رہی ہو بعد میں کسی ببلو ڈبو کو گود میں لے کر سیاں جی کا۔کندھا دبوچ کر بیٹھا کروگی سمٹ کر بائک پر

لہک۔لہک کر کہتی شرارت آنکھوں میں بھرے وہ کھلکھلا رہی تھی۔ مزنہ کو اس پر۔غصہ آنے کی بجائے ہنسی ہی آگئ

دیکھی جائے گی۔ مزنہ نے کان پر سےمکھی اڑائی

یہ بتائو آج شام کا کیا پروگرام ہے ریفریشمنٹ سینٹر چلیں؟ 

بیگ اٹھا کر کھڑے ہوتے اس نے پوچھا مگر خلاف توقع ماہا نفی میں سر ہلا گئ

نہیں بھئ آج ڈنر عادل کے ساتھ کرنا ہے۔ تم مجھے گھر چھوڑ دو

ماہا بھی ہاتھ جھاڑتی اٹھ گئ۔

مزنہ کے ماتھے پر بل پڑ گئے۔

ڈنر کیوں؟ رات کو کیا ضرورت ہے عادل کے ساتھ ڈنر پر جانے کی؟ یہاں ہر وقت اکٹھے پھر پھرا کر دل نہیں بھرتا؟ یہاں تو چلو انکو پتہ نہ چلے یوں رات گئے پھرنے سے نہیں روکتے گھر والے تمہیں۔ 

ماہا منہ کھولے اسکی جھاڑ سنتی گئی پھر اسکے کندھے پر مکا مار کر بولی

بس بس ذیادہ ڈائلاگ بازی مت کرو۔فیملی ڈنر ہے عادل کے گھروالے اور میرے گھر والے بھی ہوں گے۔ اور۔ 

وہ بولتے بولتے مسکائی

کوئی کینڈل لائٹ رومینٹک ڈنر پر نہیں جا رہے ہم۔ ماہا نے جتایا تو وہ سر جھٹک کر رہ گئ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ماہا کو اسکے گھر چھوڑ کر وہ آدھے پنڈی کا چکر لگا کر واپس گھر پہنچ پائی تھی۔ نو بج رہے تھے امی اسکے انتظار میں ٹہل رہی تھیں۔ دو دن سے اس سے مخاطب نہ ہونے باوجود وہ اسکے کھانے پینے کا اسی طرح خیال رکھ رہی تھیں۔

کنزی سو گئ۔ اس  نے یونہی پوچھا تھا مگر وہ جواب دیئے بنا کچن میں چلی گئیں۔

وہ تھکی تھکی سی اپنے کمرے میں آکر بیڈ پر گر سی گئ۔ 

اسلام آباد میں اپنے ماہی منڈے والے حلیئے میں سارا دن گھومنے میں بھی اسے ان نظروں اور جملوں کا سامنا نہ کرنا پڑتا تھا جو گلریز پنڈی میں ماہا کو اسکے گھر چھوڑنے کے بعد اسے گلیوں میں سے گزرتے سڑک پر آتے سگنل پر رکتے سننا پڑا تھا

ماہی منڈا،اوئے لڑکے، اوئے۔سن یہ بتا دے لڑکا ہے یا لڑکی، غلیظ جملے بازی ریس لگائے گا؟ نہیں ریس لگائے گی بول

سنو شش۔۔ 

آوازیں شور روشنیاں۔۔۔ 

ماں کی نرم سی آواز۔ ۔۔۔

مزنہ۔ 

اس نے جھٹ آنکھیں کھول دیں۔امی کھانے کی ٹرے لیئے کھڑی تھیں۔وہ ذہنی طور پر ابھی بھی شائد گھر نہ پہنچی تھی۔خالی خالی نگاہوں سے دیکھتی رہی جیسے انکے وہاں کھڑے ہونے کا مقصد سمجھ نہ آرہا ہو

سرخ لال بوٹی سی آنکھیں تپا۔ہوا چہرہ۔ ماں کا کلیجہ تڑپ سا گیا۔

ٹرے سائیڈ ٹیبل پر رکھ کر اسکے پاس آبیٹھیں۔

کیا ہوا مزنہ طبیعت تو ٹھیک ہے نا بیٹا۔ 

امی آپ بھی مجھ سے نفرت کرتی ہیں؟

وہ یونہی دیکھتی رہی  کہنا کیا تھا کہہ کیا گئ۔۔اس نے انکی گود میں منہ چھپا لیا۔ 

نہیں میری جان تم تو میری سب سے لاڈلی بیٹی ہو ۔۔

امی تڑپ ہی تو گئیں اسے اپنے بازوئوں کے حلقے میں لے لیا۔۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ماہا بے خوش خوش یونیورسٹی آئی تھی۔ اسکو دیکھتے ہی بھاگی آئی گلے سے جھول ہی گئ۔ اسکے بے ساختہ اظہار پر اسکا سارا گلہ جاتا رہا موڈ بھی اچھا ہوگیا۔ 

کیا ہوا خیریت ہے؟ بہت خوش نظر آرہی ہو اور آج تو عادل کا دم چھلا بھی ساتھ نہیں ہے۔ 

پوچھتے پوچھتے بھی وہ طنز کیئے بنا نہ رہ سکی۔

اب سے وہ میرے آس پاس بھی نہیں پھٹکا کرے گا۔

وہ کھلکھلائی

کیوں بھئ منگنی ٹوٹ گئ کیا تمہاری۔ 

اسے سچ مچ یہی خیال گزرا تھا۔ کوئی اور وقت ہوتا تو ماہا اسکے گھونسا دے جڑتئ پر آج وہ اور ہی ہوائوں میں تھئ۔جھوم کے بولی

اللہ نہ کرے بس ہماری شادی طے ہوگئ ہے دو مہینے بعد کی تاریخ رکھی گئ ہے سو اب سے ملنا جلنا بند دو مہینے تک ہک ہا۔ میں کیسے رہوں گی یار۔۔۔۔وہ اسکے ساتھ ساتھ قدم بڑھا رہی تھی مگر اسکی بات سن کر اسکے قدم رک سے گئے

بس جلدی جلدی سب کام ہونے ہیں ڈھیروں شاپنگ کرنی ہے مجھے اور اب سے تم اگلے دو مہینے تک آفیشلی میری ڈرائیور ہو ساری شاپنگ۔۔۔۔۔ بولتے بولتے اسے احساس ہوا کہ اکیلی چلتی جا رہی ہے تو چونک کر مڑی

کیا ہوا آئو نا کلاس شروع ہونے والی ہے  ۔۔ 

اس نے یاد دلایا۔

کیوں شادی کرنے لگی ہو ابھی نا تمہاری پڑھائی مکمل ہے نا عادل کی کماتا وماتا تک نہیں ہے۔۔ اس نے اتنا منہ بنا کر کہا تھا کہ ماہا کو ہنسی آگئ

پکا لڑاکا پھپھیوں کی طرح اعتراض اٹھائے ہیں۔ ہا ہا ہا۔

بھئی ہمارا بی ایس کا آخری سمسٹر ہے اسکا ایم بی اے کا۔مڈز تو ہو چکے ہمارے فائنلز بھی ختم ہو جائیں گے دو مہینے تک پھر کیا کرنا میں نے تو شادی ہی سہی۔

وہ بے حد خوش اور مگن تھی سو آرام سے تاویلیں گھڑتی گئ۔۔

مگر دو مہینے میں عادل کی نوکری تو نہیں لگ جائے گی۔

اس نے ذرا بھنا کر کہا۔ 

تو عادل نے کونسا نوکری کرنی ہے ۔تایا ابو کا کاروبار ہی سنبھالنا ہے۔ چلو اس فالتو بحث میں پراکسی نکل جائے گی۔

وہ اسکا بازو تھام کے کھینچ لے گئ ۔۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔

ماہا نے اپنا کہا سچ کر دکھایا نا امتحانوں کی فکر تھی نا ہی کوئی اور کام دھندہ بس شاپنگ کا پروگرام بنا کر فون کھڑکاتی اور سارا دن اسے لیئےلیئے بازاروں کے چکر لگواتی رہتی۔ دھوپ میں پھر پھر کر اسکا رنگ سیاہ ہوگیا نا دوپہر کے کھانے کی فکر نا شام کے امی نے کچھ دن تو برداشت کیا اسکا یہ معمول مگر جب شام کو تھک ہارکر وہ جب بسترپر گری اور تھکن کے مارے  کھانے سے بھی انکار کردیاتو انکےصبر کاپیمانہ لبریز ہوگیا بھنا کر باہر آئیں۔کنزی برتن دھورہی تھی انہوں نے ساری بھڑاس اسکےسامنے نکال دی۔

اتنا سا منہ نکل آیا ہے مزنہ کا۔نوکر ہی سمجھ رکھا ہے ماہا نے ۔صبح یونیورسٹی شام کو شاپنگ جانے دن  بھر کچھ کھاتی پیتی بھی ہے کہ نہیں۔عجیب لڑکی ہے بھئ اپنی ماں بہن کے ساتھ شاپنگ کرے گاڑی میں گھومے میری بیٹی ملازمہ ہے کیا اسکی کہ اسے لیئےلیئےبازاروں کے چکر لگائے۔۔۔ 

روٹی پکاتےانہوں نے تھپ تھپ سارا غصہ نکال دیا۔ کنزی نے ماں کا غصے سے لال بھبھوکا چہرہ دیکھا تو مسکرا دی

ارے امی ماہا باجی اکلوتی تو ہیں کہاں کوئی بہن بھائی ہے انکا اور آنٹی کے ساتھ تھوڑی کھل کے گھوم پھر کر شاپنگ کر سکتی ہوں گی۔ جبھی مزنہ کے ساتھ جاتی ہیں کہ آرام سے دونوں سہیلیاں گھوم پھر کر چیزیں لیتی ہوں گی۔

ہاں تو کوئی حد ہونی چاہیئےنا روز روز کا یوں بازاروں میں پھرنا ابھی بھئ مزنہ کا چہرہ لال ہو رہا تھا ہلکا ہلکا بخار بھی لگ رہا تھاجیسے۔تھکا ڈالامیری بیٹی کو ابھی آئے ذرا اسکا فون خبرلیتی ہوں میں اپنے ابا کی گاڑی کو ہوا لگائے نا۔۔ 

کوئئ ضرورت نہیں اسکی خبر لینے کی۔دو چار دن کی ہی بات ہے اورجب مجھے کوئی اعتراض نہیں ہے تو۔۔ 

مزنہ شائد پانی پینے آئی تھی کچن کے دروازے کا سہارا لیئے انکی بات سن کر فورا بولی۔

حال دیکھو اپنا نچڑ گئ ہو چار دن میں کھانا وانا بھی چھٹ گیا ہے اس طرح تو بیمار پڑ جائو گئ۔ 

امی فکر مندی سے اسکا چہرہ اپنے ہاتھوں میں لیکر بولیں۔انکی بات پر کنزی نے بھی ذرا غور سے اسکی شکل دیکھی۔پژ مردگئ چہرے سے عیاں تھی۔ مضمحل سی وہ دروازے کا یوں سہارہ لیئے کھڑی تھی جیسے چکرا کر گر جائے گی۔

بس آج کھانے سے انکار کیا تھا دل نہیں تھا۔چلیں ابھی پیٹ بھر کر کھانا کھاتا ہوں آپکی فکر دور کرنے کو ٹھیک ہے۔ 

اس نے بشاشت طاری کرتےہوئےجیسے انکو بہلایا۔وہ بہل بھی گئیں۔تینوں نے اکٹھے بیٹھ کر کھانا کھایا مگر رات کو اسکو شدید بخار ہوگیا۔ صبح امی اٹھانے آئیں تو بخار میں پھنکتےکراہ بھی رہی تھی۔ امی کے تو ہاتھ پائوں پھول گئے۔ کنزی کو بھئ کالج جانے سے روک دیا اسکے سرہانےہی تسبیح لیکر بیٹھ گئیں۔ کنزی نے دودھ گرم کرکے لا کر دیا تو امی کو ڈبل روٹی یاد آئی

ڈبل روٹی ہی لے آئو بھوک لگ رہی ہوگی اسے۔ 

امی ڈبل روٹی تو ختم ہوگئ ہے۔ کنزی نے دھیرے سے بتایا

تو وہ اسےلانےکا کہتے کہتے رک گئیں

ہاں کل مزنہ کو یاد کرایا تھا لانا بھول گئ شاید۔

مزنہ کی پیشانی سہلاتے انہیں خیال آیا۔

لانے والی ہی وہی تھی ہر چیز۔

دوپہر تک بخار کا زور کم تو ہوا مگر سودا سلف ہر چیز کیلئے وہ دونوں بیٹھی رہ گئیں۔

گھر میں بس آلو تھے وہی پکا لیئے۔دلیہ ختم تھا دودھ بھی ختم تھا۔سونے پر سہاگہ موٹرالگ چلتے چلتے رکی تو دھواں دے گئ۔ابھی مزنہ ٹھیک ہوتی تو فورا مکینک لے آتی ۔ ڈاکٹرتک بلانے کیلئے وہ دونوں بیٹھی تھیں۔

امی مزنہ بیمار ہوئی ہے تو گھر کاہر کام ہی رک گیا ہے۔آج تو موٹر بنا بھئ گزارا ہو جائے گا کل کیا کریں گے ۔سودا سلف کیلئے کیا کریں؟ 

کنزی نے کہا تو وہ سوچ میں پڑ گئیں۔پھر حفصہ کو فون ملا دیا۔ حفصہ میاں کے ساتھ چکوال گئ ہوئی تھی وہ الگ پریشان ہو گئ مزنہ کی طبیعت کتنی خراب ہے جو ایسے فون کرناپڑا مشکل سے اسے مطمئن کرکےفون بند کیا۔

قریبی مارکیٹ سے سودا تو میں جا کر لے آتی ہوں باقی پانی احتیاط سے خرچ کرنا تم۔اور مزنہ سے کہو تھوڑی ہمت پکڑے قریبئ کلینک لے چلتے ہیں۔

امی نےخود ہی حل نکالا۔کنزی سر ہلاگئ۔ برسوں سے گھر سے نکلنے کی عادت نہیں تھی۔اللہ بخشے شوہر سخت گیرتھےکبھی انکے ساتھ بھی بازار جانے کی نوبت نہ آئی۔ہاں انکے بعد حالات نے خواریاں کٹوائیں ان سے مگر اب پھر پچھلے کئی سالوں سے اکیلے تو گھر سے نکلی ہی نہ تھیں۔ مگر بڑھتی عمرتھوڑا بہت با اعتماد کر ہی گئ تھی سو چادر 

اوڑھ کرنکلیں تو سودے سلف کے بعد مکینک کو بھی بلا لائیں۔موٹر اپنی نگرانی میں ٹھیک کروائی کنزی ماں کو دیکھ دیکھ کر حیران ہوئی

امی ایویں ہی ہم نے سب کام مزنہ پر ڈال رکھے ہیں یہ سب کام تو آپ بھی کر سکتی ہیں ہم ایویں مکینک بلانےتک کیلئے بھی مزنہ کا انتظار کرتے تھے۔

کنزی مزنہ کے لیئے دودھ ڈبل روٹی لے جاتے ہوئے یونہی کہہ رہی تھی انہوں نے سر ہلا دیامگر یہ تو انکو پتہ تھا سائکلوں  والے کے پاس جا کر موٹر ٹھیک کرنے کیلئے کاریگر کو بلارہی تھیں۔وہ تو بھلا انسان تھا مزنہ کو بھی جانتا تھا انکو گھربھیج کر خود مکینک کو فون کرکے بھجوا دیا تھا۔۔۔ 

۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اگلے دو دن مزنہ کا بخار چڑھتا اترتا رہا۔ حفصہ پریشان ہو کر فورا اگلے دن واپس آئی۔عامر ڈاکٹر کو بلا کر لائے دوائیں وغیرہ وہ ہی سب خیال رکھتے رہے۔ پھر بھی دو دن میں مزنہ نچڑ سی گئ۔ بخار کبھی سر پر چڑھنے لگتا کبھی چہرہ تھر تھرانے لگتا۔ ڈاکٹر نے شدید تفکر کا نتیجہ بتایا۔ امی نے مصلہ سنبھال لیا جانے کتنے نفل مان لیئے تیسرے دن وہ مکمل ہوش میں آئی تو فورا سجدے میں جا گریں۔کنزی پچھلے دو دن سے اسکے پاس ہی بیڈ پر سو رہی تھی امی کا میٹرس بھی اسی کمرے میں بچھا لیا تھا۔حفصہ کوشش کے باوجود رہ تو نہ سکی مگر تھوڑی تھوڑی دیر بعد فون کرکے خیریت پوچھ لیتی تھی۔ اس دن بھئ وہ مزنہ کے ساتھ سو رہی تھی جب اچانک مزنہ کا بخار بڑھنے لگا۔ کنزی نے اٹھ کر اسکے تھرمامیٹر لگا کر بخار دیکھا پھر پانی لا کر سر پر پٹیاں رکھنے لگی۔۔ وہ جانے کیا بخار میں منہ ہی منہ میں بڑبڑانے لگی۔اس نے کان لگا کر سننا چاہا ۔۔ ادھورے ٹوٹے جملے۔ وہ ماہا کو پکار رہی تھی۔ اسے اسکی حالت دیکھ کر خوف ہی آنے لگا۔ امی کی شائد ابھی آنکھ لگی تھی اس نے ایک دو بار پکارا مگر جب وہ ٹس سے مس نہ ہوئیں تو خود ہی جو جو سورت سمجھ آئی پڑھنے لگی۔ اس نے ایکدم اپنی لال انگارہ آنکھیں کھول کر دیکھا۔ 

تم تم ماہاتم۔۔۔۔۔۔۔۔۔۔۔۔۔۔۔۔۔۔۔۔۔ آگے جو ٹوٹے پھوٹے الفاظ تھے کہ زلزلہ تھے۔ انہوں نے کنزی کے سر پر جیسے پہاڑ گرا ڈالا تھا۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔ 

صبح اسکا بخار ختم ہو چکا تھا۔خود ہی اٹھ کر منہ ہاتھ دھو کر کپڑے بدلےناشتہ کیا سب دوائیں بنا چوں چراں کیئے کھا لیں۔ ۔یونیورسٹی جانے کی تو امی نے اجازت نہ دی۔ کنزی کی لگ رہا تھا طبیعت خراب ہوگئ تھی۔ سر بوجھل ہو رہا تھا آنکھیں رت جگے سے سرخ بھی ہو رہی تھیں پھر بھی یونیفارم پہنے تیار کھڑی تھی کالج جانے کو۔ ناشتے تک کوتیار نہ تھی۔

میں چھوڑ آئوں تمہیں کالج۔ اس نے بغور اسکی ڈھیلی طبیعت کو دیکھتے ہوئے آفر کی

نہیں ۔اس نے فورا انکار کیا

ساری رات تو بخار رہا ہے اب جاکے طبیعت سنبھلی ہے تو ذیادہ تھکن مت لو۔ ابھئ بھی ناشتے کے بعد جا کے سوجانا۔ ڈاکٹر نے ذیادہ سے ذیادہ آرام کرنے کا بتایا ہے۔ بتائو ایسے چہرہ تھر تھرا رہا تھا تمہارا بخار میں میری تو جان ہی نکل گئ۔ 

امی نے بھی فورا گھرکا وہ خاموشی سے کان دبا کے سنے گئ۔ کنزی نے دزدیدہ نگاہوں سے اسے دیکھا پھر جلدی سے اپنا بیگ اٹھا کر باہر گیراج میں چلی آئی۔حالانکہ ابھی اسکی وین آنے میں پورے دس منٹ باقی تھے۔۔۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

امی کے حسب ہدایت وہ آکر کمرے میں لیٹ تو گئ مگر نیند کوسوں دور تھی۔ یونہی وقت گزاری کیلئے موبائل استعمال کرنے لگی۔ماہا نے مشہور ریستوران کا چیک ان لگایا ہوا تھا۔

ہمراہ عادل۔ اسکے تن بدن میں آگ سی لگ گئ۔ کہاں کہہ رہی تھی اگلے دو مہینے تک عادل سے ملنا ملانا بند اور اب اسکے ساتھ ہوٹلنگ ہو رہی ہے۔

اس نے اسی وقت یہی سب لکھ کر واٹس ایپ کر ڈالا۔ 

اسکا پیغام اس نے فورا پڑھا تھا مگر جواب نہیں دیا۔

کیا بات ہے جواب کیوں نہیں دے رہی ہو؟ یا عادل نے منع کیا ہے جواب دینے سے بھی۔ 

اسکا یہ پیغام بھئ پڑھ لیا گیا تھا جواب ندارد

تمہارے گھر والے جانتے ہیں تم باہر کس کے ساتھ گلچھرے اڑا رہی ہو؟

اسکو اتنا غصہ آیا کہ اس نے یہی لکھ بھیجا

میرے گھر والے بھئ ساتھ ہیں میرے اور تم اپنی چھوٹی سوچ اپنے پاس رکھو۔عادل نے منع نہیں کیا تھا جواب دینے سے میں کھانا کھا رہی تھی۔ہاں اور اگر وہ منع کرتا تو میں واقعی میں منع ہو جاتئ جواب نہ دیتئ۔ 

اسکا سچ مچ اسکی فضول بات پر دماغ گھوم گیا تھا سو سخت ہی جواب دیا اسے۔

اتنا اہم ہو گیا ہے وہ دو ٹکے کا عادل تمہارے لیئے کہ تم مجھے ایسے کہہ رہی ہو۔

اسے اتنے سخت جواب کئ توقع نہ تھی۔اسکے پیغام کو اس بار پڑھا بھئ نہیں گیا تھا۔اس نے جھلا کر فون ملا لیا۔ دو تین بیلوں کے بعد لائن کاٹ دی گئ۔ اس نے دوبارہ فون ملایا تو  ماہا نے فون ہی بند کردیا۔ 

ہائش۔اس نے غصے میں آکر فون پوری قوت سے زمین پر پٹخ دیا۔وہ تو شکر ہے میٹرس بچھا ہونے سے بچت ہوگئ۔اسی وقت حفصہ جو  کمرے میں داخل ہورہی تھی گھبرا کر ٹوکنے لگی

ارے ارے کیا کر رہی ہو۔ ؟ 

حفصہ کو دیکھ کر وہ بھی گڑ بڑا گئ۔ آگے ہو کر موبائل کی باقیات پر نظر ڈالی 

شکر ہے بچت ہوگئ۔ حفصہ نے آگے بڑھ کر فون اٹھایا اور گھورنے لگی

لگتا ہے طبیعت ٹھیک ہوگئ تمہاری۔ دوبارہ جناتی غصہ وارد ہو رہا ہے تمہارا۔ شکر ہے۔ پتہ ہے امی کتنا پریشان ہوگئ تھیں تمہارے لیئے کبھی اتنی شدید بیمار نہ پڑیں تم ۔

حقیقت تو یہ کہ اسے ٹھیک ٹھاک بیٹھا دیکھ کر حفصہ نے اطمینان کا سانس لیا تھا۔مزنہ کھسیا کر فون اسکے ہاتھ سے لینے لگی

ہاں آج بہتر ہوں۔

بہتر ہوتے ہی غصہ کس پر آگیا تمہیں ہیں؟ حفصہ اطمینان سے اسکے بیڈ پر برابر آن بیٹھی 

وہ بس۔ وہ جز بز سی ہوئی

اور وہ تمہاری رگ جاں ہم نوالہ ہم پیالہ ماہا صاحبہ کہاں مصروف ہیں ؟ تین دن سے بیمار ہو ایک بار بھی خیریت پوچھنے کو بھی فون نہیں کیا اس نے کیسی دوست ہے۔ 

حفصہ نے کہا تو اسکا غصہ پھر واردہو گیا

موصوفہ عادل کے ساتھ لنچ کر رہی ہیں۔ دو مہینے بعد شادی ہے ان دونوں کی پھر بھئ ہر وقت اکٹھے رہتے ہیں۔گھر والےتک  نہیں روکتے ان دونوں کو۔۔۔

اس نے اتنےدل جلے انداز میں کہا تھا کہ حفصہ کو ہنسی ہی آگئ مگر اسے منہ پھلائے دیکھ کر سمجھانے والے انداز میں بولی

تمہیں کیوں اتنا غصہ آرہا ہے؟ سہیلی پرائی ہورہی ہے تمہاری اب تمہارے ساتھ تھوڑی وقت گزارا کرے گی اپنے منگیتر کے ساتھ گھوما پھرا کرے گی۔ 

کیوں بھئ۔ شادی کر رہی ہے تو بس اب سب کچھ عادل ہے میری کوئی حیثیت نہیں رہی اسکے نزدیک

وہ دلی جزبات زبان پر لے آئی۔ حفصہ اسکے بچپنے پر مسکرا کر رہ گئ

یہی ہوتا ہے چندا۔ اب ہم تینوں بہنیں کیسے ہر وقت سر جوڑ کے بیٹھی رہتی تھیں اب مہینہ ہو جاتا مجھے تم دونوں کی شکل بھی دیکھے۔ 

اس نے پیار سے اسکے بال بگاڑے

شادی ہم لڑکیوں کی زندگی بدل دیتی ہے۔ہماری ترجیحات بھی بدل۔جاتی ہیں۔ اپنے بہن بھائئ گھر والے دور ہو جاتے ہیں دوستیاں تو بالکل ہی ختم بھی ہو جاتی ہیں۔ اگر سیاں جی قسمت سے اچھے مل جائیں تو ہی دوستیاں قائم رہتی ہیں ورنہ سب ختم۔۔۔ 

میں ایسا نہیں کروں گا۔میرے لیئے ماہا ہمیشہ میری سب سے بہترین قریبی دوست رہے گی۔۔

وہ اٹل انداز میں ضدی انداز سے بولی

اب یہ تو وقت بتائے گا کیا پتہ تم شادی کے بعد سیاں سیاں کرو اور سہیلیاں بھول جائو۔

وہ بھی جوابا ہلکے پھلکے انداز میں بولی۔ 

میں شادی ہی نہیں کروں گا پھر۔ اس نے حفصہ کی آنکھوں میں آنکھیں ڈال کر کہا تو حفصہ کی آنکھوں میں الجھن تیر گئ۔ اسکی طبیعت بھی ٹھیک نہ تھی سو بحث میں نہ پڑی۔

بات بدل دی۔ 

اچھا یہ بتائو۔ گریڈز کیسے آئے ہیں مڈز میں تمہارے؟ 

اس نے بڑے پیار سے پوچھا تھا مگر مزنہ کی پیشانی پر بل پڑگئے

کیوں گریڈز کیوں یاد آگئے۔ ؟ 

ایسے ہی۔ حفصہ نے ٹالنا چاہا۔ گھما پھر کر پوچھنے لگی

کوئی جھگڑا وگڑا تو نہیں ہوا کوئی یونیور سٹی میں کوئی ٹیچر وغیرہ تو نہیں دشمن بنا ہوا ؟ اگر کوئی مسلئہ ہے تو تم کھل کر مجھے بتا سکتی ہو۔۔ 

ایسا کچھ نہیں ہوا اگر ہوا بھی ہے تو میں خود نمٹ سکتی ہوں ایسے معاملوں سے۔ مزنہ قطیعت سے بولی

کبھئ کبھی ہمیں لگتا ہے ہم بہت مضبوط ہیں اور ہم ہوتے بھی ہیں مگر بہت پریشانی ہو نا کسی بات کی تو ذہن پر بوجھ بہت بڑھ جاتا ہے ایسے موقعے پر کسی کے ساتھ باتیں کرکے وہ بوجھ بانٹ لیا جائے تو نا صرف انسان ہلکا پھلکا ہوجاتاہے بلکہ ہو سکتا ہے اگلا اتنا اچھا مشورہ دے کہ الجھن پریشانی ہی ختم ہو جائے۔ تمہارے ذہن پر بھی اگر کوئی بوجھ کوئی الجھن ہے تو تم مجھ پر بھروسہ کر سکتی ہو بتا سکتی ہو کیا چیز پریشان کر رہی ہے۔

حفصہ اس سے اسکی پریشانی کی اصل وجہ اگلوانا چاہتی تھی۔ ڈاکٹر نے صاف کہا تھا کہ اسکے ذہن پر شدید دبائو ہے جسکی وجہ سے اسکو فٹس پڑنے لگے تھے بہتر ہوگا اسکی ذہنی پریشانی میں کمی لائی جائے اس سے بات کریں اسکا خیال رکھیں اسکو احساس دلائیں کہ اسکے گرد محبت کرنے والے لوگ ہیں جو اسے مطمئن اور خوش دیکھنا چاہتے ہیں۔ 

مزنہ اسے بے تاثر نظروں سے دیکھتی رہی

بتا دوں مجھے کیا پریشانی ہے؟۔

اسکا انداز عجیب سا ہوگیا تھا

ہاں نا میری جان مجھے نہیں بتائوگی تو پھر کسے بتائوگی؟ 

حفصہ نے محبت سے اسکےپیشانی کے  بال سمیٹے۔

ماہا مجھ سے دور جا رہی ہے آپی۔ میں اسکے بغیر نہیں رہ سکتا۔۔۔ 

اس نے سر جھکا کر اپنا مسلئہ صاف صاف بیان کر دیا۔۔ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ختم شد
جاری ہے

مجھ میں ہی ہے رنگوں کی کمی

قسط 2

تم نے چائے نہیں بنانی نہ بنائو میرے بارے میں کسی قسم کی فضول بکواس کی منہ توڑ دوں گا تمہارا۔ جائو نکلو یہاں سے۔گیٹ لاسٹ۔ 

اسکا انداز اتنا سخت تھا کہ باوجود خواہش کے کنزی بول نہ پائی شاکی نگاہ سے ماں کو دیکھتی پیر پٹختی باہر نکل گئ

بہت بد تمیز ہو گئ ہے یہ۔ اتنی زبان کب لگ گئ اسکے۔ سیدھا کرنا پڑے گا اسے اب۔ تم نماز وماز پڑھ لو میں چائے بنا کر لاتی ہوں۔ 

امی سبھائو سے اسکے کندھے کو سہلاتی اٹھنے لگیں۔اپنی کنپٹی سہلاتی مزنہ چونک گئ پھر ٹھنڈی سانس لیکر ہموار لہجے میں بولی

مجھے نہیں پینی چائے۔لائٹ اور دروازہ بند کرکے جائیے گا۔ 

میں لیٹوں گی تھوڑی دیر۔

وہ بستر پر دراز ہوگئ

مگر بیٹا نماز کا وقت۔۔ امی نے ٹوکنا چاہا جوابا اس نے اپنا بازو آنکھوں پر ٹکا دیا۔امی چپ ہو گئیں۔اس وقت یقینا وہ کچھ سننے سنانے کے موڈ میں نہیں تھی۔ سواسکی ہدایت کے مطابق دروازہ اور بتی بند کرتی خود بھی باہر نکل آئیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کنزی بیڈ پر کپڑے پھیلائے انہیں کھول کھول کر دیکھ رہی تھی۔

بہت بدتمیز ہو گئ ہو تم بڑی بہن سے ایسے مقابلہ بازی کرتے ہیں؟ ذرا سا چائے بنا کر دے دیتیں تو گھس جاتیں۔

امی نے کمرے میں آتے اسے آڑے ہاتھوں لے لیا۔ 

کنزی نے ایک نظر انہیں دیکھا پھر گلابی پھولدار پرنٹ کی خوبصورت قمیض بیڈ پر پھیلا کر بظاہر سرسری سے انداز میں بولی

امی یہ قمیض مزنہ کو آجائے گی نا؟ 

فٹنگ والی جدید تراش خراش کا وہ کرتا پاجامہ دیدہ زیب لگ رہا تھا سلنے کے بعد۔

یہ تو تمہارا سوٹ ہے مزنہ نے تو گرے رنگ کا مردانہ کرتا سلوایا ہے۔ امی اسکے بات بدلنے پر چیں بہ چیں ہوئیں 

ہاں تو کیا ہوا۔بہنیں ایک دوسرے کے کپڑے پہنتی ہی ہیں مزنہ پر یہ جچے گا آپ اسکو کہییئے گا کل یونیورسٹی  یہی پہن کر جائے۔۔

وہ احتیاط سے تہہ لگاتے ہوئے بولی

تمہیں پتہ تو ہے وہ کتنا خفا ہوگی۔ اس سے یہ کپڑے نہیں پہنے جاتے تنگ ہوتی ہے وہ۔ اسکے لیئے جوڑا سل کر آیا ہے نا وہی پہنے گی وہ۔

امی بیڈ کرائون سے ٹیک لگاتے آرام سے بیٹھتی ہوئی بولیں۔

کیوں؟ کنزی تیز ہو کر دھپ سے بیڈ پر آن بیٹھی

سب لڑکیاں ایسے کپڑے پہنتی ہیں۔اگر اسے ڈھیلے ڈھالے پسند ہیں تو ہم اسکے لیئےڈھیلے ڈھالے کپڑے بنوا دیتے ہیں۔کب تک وہ مردانہ کپڑے پہنا کرے گی؟آپ سمجھائیں نا اسے۔ اب بڑی ہوگئ ہے۔ دوپٹہ اوڑھا کرے جیسے میں اوڑھتی ہوں لڑکیوں والے کپڑے پہنا کرے آپکو اندازہ بھی نہیں ہے لوگ اسکے بارے میں کیسی کیسی باتیں بناتے ہیں۔

کنزی کے کہنے پر وہ سنجیدہ سی ہو کر سیدھی ہوئیں

سچی بات تو یہ کہ وہ میری ایک نہیں سنتی۔جانتی تو ہو کتنی ضدی ہے۔قسمیں دے دے کراس کو بال کٹوانے سے منع کیا ہے اس پر بھی وہ کندھوں سے ذرا سا نیچے بال نہیں جانے دیتی۔ اب ایک بات منوائی ہے آہستہ آہستہ اسکو کپڑوں پر بھی منا لوں گئ

کب؟ یونیورسٹی تک تو پہنچ گئ ہے۔ نا بات چیت کا انداز بدلا ہے نا چال ڈھال کپڑے یا تو مردانہ کرتے پہنتی ہے یا جینز شرٹ۔اب تو اسے دیکھو تو پہلی نظر میں یہی گمان ہوتا کہ لڑکا ہی ہے۔ 

کنزی کے کہنے پر وہ آہ بھر کے رہ گئیں۔

حق ہاہ میری قسمت۔آج ہادی زندہ ہوتا تو اتنا ہی بڑا گھبرو جوان ہوتا دو سال کا ہی تو فرق تھا مزنہ اور ہادی میں۔اکٹھے کھیلتے تھے کپڑے بھی ایک جیسے پہنتے دوست بھی مشترکہ ہوتے تھے۔کتنی گم سم ہوگئ تھی اسکے جانے پر میرا خود حال برا تھا۔ اسکو ہادی کے کپڑے پہنے گھومتے دیکھتئ تو لگتا تھا ہادی ہی میری آنکھوں کے سامنے چل پھر رہا ہے۔ وہ کہتے کہتے آبدیدہ ہو گئیں۔مگر جانے کیوں ہر بار انکی ایسی کسی دکھ بھری بات پر تاسف سے انکو گلے لگا لینے والی کنزی آج بالکل نہ پگھلی۔ 

ہادی بھائی آج سے کئی برس پہلے گزر چکے۔ اس بات کو گرہ سے باندھ لیں۔ نہ وہ واپس آسکتے نا ہی انکی کمی کوئی پوری کر سکتا ہے۔ حقیقت یہی ہے کہ مزنہ ہماری بہن ہے وہ چاہے جیسے مرضی۔۔۔

بولتے بولتے اس کی ماں کی آنکھوں سے جاری تواتر سے گرتے آنسوئوں پر پڑی تو خاموش ہی ہوگئ۔ 

جائو تم چائے بنائوایک چائے بنانے کیلئے کیا کیا تاویل نہ گڑھ لی بس زبان چلوا لو اس لڑکی سے ۔

آنسو پونچھتے ہوئے امی بگڑیں تو وہ جھلا کر اٹھ گئ۔

بنا رہی ہوں چائے۔ کبھی میری بات نہ سنئیے گا آپ نہ سمجھیئے گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

صبح دونوں ہی خاموش تھیں۔ امی کا بھی منہ پھولا ہوا تھا۔ کنزی کی وین آئی تو مزنہ بھی ساتھ اٹھ گئ۔ وہ بائک نکال رہی تھی جب اس نے وین والے کو کہتے سنا

واپسی پر وین نہیں آئے گی مجھے بہت ضروری کام سے گائوں جانا ہے واپسی پر آپ لوکل آجائیں گا۔ 

کنزی سر ہلاتی وین میں بیٹھنے جا رہی تھی جب اس نے پیچھے سے آواز لگا ئی

تم دو بجے کالج سے نکل آنا میں آجائوں گا لینے 

اور کوئی وقت ہوتا تو کنزی خوش ہوجاتی مگر اس وقت پلٹ کر خاصے سخت انداز میں بولی

کوئی ضرورت نہیں ہے تمہیں میرے کالج آنے کی میں خود آجائوں گی وین سے۔

مزنہ نا سمجھنے والے انداز میں  دیکھتی رہی وہ آرام سے وین میں بیٹھ کر یہ جا وہ جا۔ 

ذیادہ ہی دماغ خراب ہو رہا ہے اسکا۔ اسکو کیا لگتا معافی مانگوں گا میں۔۔ خود بدتمیزی کرتی ہے اوپر سے اکڑ بھئ رہی ہے۔ 

غصے سے بائک کو زوردار کک لگا دی۔ 

یونیورسٹی پہنچ کر حسب معمول اس نے ماہا کو ڈھونڈا تھا۔

نہ کینٹین میں نہ کلاس میں۔ کال ملائی تو کھلکھلاتے ہوئے بولی

میرے بغیر دل نہیں لگ رہا نا جانو؟ بس میں ابھی آئی ۔۔ 

اسکی کھلکھلاہٹوں کے درمیان بھی عادل کی آواز اسے سنائی دے گئ۔ 

وہ وہیں ڈیپارٹمنٹ کے باہر سیڑھیوں پر بیٹھ کر انتظار کرنے لگی

بات سنیں۔ 

ایک منحنی سی لڑکی اسکے پاس آکر بولی۔ اس نے یونہی سر اٹھا کر دیکھا

میرا نام بیلا ہے میں میڈیا اسٹڈیز ڈیپارٹمنٹ سے ہوں ٹک ٹاک بھئ بناتی ہوں آپ نے دیکھا ہوگا۔

اسکا انداز اتنا پریقین تھا کہ جیسے مشہور سیلیبریٹی ہے اور مزنہ تو یقینا فین ہی ہوگی اسکی۔ 

اچھا پھر؟۔ مزنہ کے تاثرات ہنوز رہے تو وہ تھوڑا گڑبڑا سی گئ

وہ میں ٹک ٹاک بنا رہی ہوں آپ بس میرے ساتھ چل لیں گی۔ مجھے لڑکا چاہیئے اپنے ساتھ ذرا سا ایکٹ ہے آپکو کوئی ڈائلاگ بھئ نہیں بولنا ہوگا۔ پلیز۔ 

اس نے اتنے منت بھرے انداز میں کہا کہ وہ اٹھ کھڑی ہوئی۔

اسکو ساتھ چلتے دیکھ کر وہ جیسے بے طرح خوش ہوئی تھی۔ وہ میڈیا اسٹڈیز کے ڈیپارٹمنٹ کی تھی انکو کوئی پراجیکٹ کرنا تھا جس کیلئے اداکاری کیلئے لڑکا درکار تھا یہ سب تفصیل اس نے چلتے چلتے بتائی تھی۔ 

کہاں رہ گئ تھیں اتنی بڑی یونیورسٹی میں ایک لڑکا نہ ملا تمہیں؟

اسکی سہیلیاں اسے دیکھتے ہی چلائیں۔ 

آگئ آگئی اور وہ جو بانہوں میں بانہیں ڈالنے والا سین تھا نا اسکا بھئ انتظام ہوگیا۔ 

بیلا چہکی۔مزنہ ان سب کو سوالیہ انداز میں دیکھتی رہی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ماہا کی تین مسڈ کالز آچکی تھیں۔ وہ جلدی جلدی ٹک ٹاک بنوا کر بھاگی تو ماہا ڈیپارٹمنٹ کی لابی میں بے چینی سے منہ پھلائے گھوم رہی تھی۔۔ 

اس نے جاتے ہی اسکو پیچھے سے بانہوں میں بھر لیا ماہا خفگی سے خود کو چھڑانے لگی

چھوڑو جانے دو۔ جائو اپنے سب کام نمٹا لو ماہا جائے بھاڑ میں۔ 

وہ سخت خفا تھی اسے اس پر پیار ہی آگیا اسکا گال چوم کر اسکے کندھے پر تھوڑی ٹکا دی

اتنی خفگئ میری جان۔ایسے روٹھو گی تو میں تو مرجائوں گا۔ 

اسکے مکالمے پر ماہا کھلکھلا کر ہنس پڑی۔ 

اچھا تو یہ سب سیکھ کر آئے ہو تم۔ 

اس نے کہا تو وہ ہنس دی۔ 

یار وہ بی ایس کی نئی بچیاں تھیں۔کوئی پراجیکٹ تھا انکا اسکے لیئے چھوٹی سی ویڈیو بنانی تھی۔ اب لڑکے کے تو گلے نہیں لگ سکتی تھی سو مجھ سے خوب لپٹ لپٹ کر ڈائلاگ بولے اس نے۔ یہ والے ڈائلاگ میرے تھے۔اف تھکا دیا پندرہ ری ٹیکس دیں میں نے۔ 

اول تو بی بی آپ بھئ بی ایس ہی کی ہیں فائنل ائیر ہے تو کیا ہوا ایویویں انکی اماں بن گئیں  بچیاں کہہ کر۔۔

ماہا نے کہا تو وہ ہنس کر بولی

اماں نہیں ابا۔۔ 

وہی۔ ماہا نے لاپروائی سے کندھے اچکائے۔

اچھا چلو آج ویسے بھی کوئی اہم پیریڈ نہیں ہے مجھے باہر جانا ہے کچھ شاپنگ کرنی ہے۔ 

اس نے کہا تو مزنہ نے جتانے والے انداز میں یاد کرایا

جانا تھا نا عادل کے ساتھ۔ ابھی اسی کے پاس تو تھیں۔ 

ارے عادل عادل ہے وہ میری جانو کی جگہ تھوڑی لے سکتا۔ اب میں جتنی آسانی اور سکون سے تمہارے ساتھ گھوم پھر سکتی اس عادل کے بچے کے ساتھ تھوڑی جا سکتی۔

ماہا اسے مسکا لگاتے ہوئےبولی۔ 

خاص کر شاپنگ میں تو وہ اتنا تنگ کرتا ہے جلدی کرو ۔۔ 

خیر تنگ تو میں بھئ ہوتا ہوں ایک چیز کیلئے دس دکانیں کھنگالتی ہو تم۔

لگے ہاتھوں مزنہ نے بھی جتا دیا۔ 

لیکن تم جتنا بھی چڑ لو ہمیشہ میری شاپنگ مکمل ہونے تک میرا ساتھ نبھاتے ہو ۔ماہا اسکے کندھے سے جھول گئ

کاش تم پکے والا لڑکا ہوتے سچی میں نے عادل ہو لفٹ ہی نہیں کرانی تھی۔ ماہا بے تکی ہانک رہی تھی۔ 

میں اور تم ہمیشہ ساتھ رہتے اف اتنا گھومتے پھرتے آئیڈیل کپل ہوتےہم ہائیٹ بھی میچ کرتی ہے ہماری

اسکی باتوں پر مزنہ کو ہنسی آگئ۔ 

اچھا بس بہت مسکا ہوگیا جانا کہاں ہے؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بائک پر ماہا اسکا کندھا دبوچے بیٹھی تھی۔ اور وہ آج اسے ڈرانے کو خوب تیز بائک اڑاتے لائی تھی۔ مال کے باہر بائک روکی تو وہ اچھل کر نیچے اتری ایک زور دار مکا لگا دیا اسکے کندھے پر

اگر تم یہ سمجھتے ہو نا  ایسے مجھے ڈرادوگے اور آئیندہ میں تم سے شاپنگ پر جانے کی فرمائش کرنا چھوڑ دوں گئ تو غلط فہمی ہے تمہاری آج اور آئیندہ بھی مجھے جب جب جانا ہوگا تم ہی مجھے لیکر آیا کروگے سمجھے۔ 

اسکے خونخوار انداز کے برعکس وہ سکون سے بائک کا انجن بند کر رہی تھی۔

ایک تو مجھے یہ سمجھ نہیں آرہا تحفہ عادل کیلئے تم نے لینا ہے تو میں کیوں تمہارے ساتھ یہاں خوار ہورہا ہوں بھئ

اسی کے ساتھ آنا تھا نا۔

لو۔ وہ برا مان گئ۔

پھر سرپرائز کیسے رہتا۔ ہماری منگنی کے بعد پہلی سالگرہ ہے اسکی مجھے اسکے لیئے بہت اچھا سا تحفہ لینا ہے۔

وہ جھوم جھوم کر بولی تھی۔ مزنہ اسے دیکھ کر ہی رہ گئ ۔ پھر مال میں عادل کی شاپنگ کہیں پیچھے رہ گئ جہاں اسے سیل لگی نظر آتی گھس جاتی ۔۔۔

پہلے عادل کیلئے کچھ لے لو۔ 

مزنہ کو ٹوکنا پڑا

ہاں تو عادل کیلئے تو سب سے بہترین تحفہ لینا ہے ایسے ہی تھوڑی کچھ اٹھا لوں گی کچھ دل کو جچے کچھ بھائے۔۔۔۔ اف کتنا پیارا ہے یہ

بولتے بولتے مشہور برانڈ کا بے حد خوبصورت کرتا پسند آگیا جھٹ اپنے ساتھ لگا کر دیکھنے لگی۔

تم غالبا عادل کی شاپنگ کیلئے آئی تھیں۔

مزنہ نے ٹوکا تو وہ ڈھٹائی سے ہنس دی

میں بھی تو عادل کی ہی ہوں۔۔عادل میرا میں عادل کی۔۔۔۔۔

کچھ ذیادہ ہی فدا ہو عادل پر اتنا بھئ پیارا نہیں ہے وہ  

خواتین کی سائیڈ کے مقابل ہی مردانہ کلیکش تھی وہ قصدا لاپروائی سے کہتی اسے چڑاتی اس جانب چلی آئی۔ماہا کسی اور جوڑے کی طرف مگن ہوگئ تھی اس نے دھیان نہ دیا شائد۔جبھی اسکا وار خالی گیا۔

مردانہ حصہ بالکل خالی پڑا تھا وہ ڈمی پر لگے اس خوبصورت کاٹن کے کرتے کی جانب چلی آئی۔ گلے پر ہلکا سا کام کلف لگا کرتا نیچے جینز ڈمی خوب سج رہا تھا

اس جانب لگا ہوا ہے یہ جوڑا اگر آپ ٹرائی کرنا چاہیں تو  

اسکے مردانہ حلیئے اور کرتے کو دیکھنے کے انداز سے یقینا اس سیلز گرل کو غلط فہمی ہوئی تھی۔ بولتی قریب آئی تو اسے دیکھ کر جھجک سی گئ

سورئ میں سمجھی آپ اپنے لیئے دیکھ رہے میرا مطلب دیکھ رہی ہیں۔

خالص مردانہ کرتے واسکٹ اور جینز میں ملبوس خاتون کو دیکھ کر اسے یقینا حیرت کا  جھٹکا سا لگا تھا۔

وائو۔ مجھے پتہ تھا تم میری مدد کروائوگے۔ یہ واقعی بہت پیارا کرتا ہے۔عادل کیلئے دیکھ رہے ہو نا

ماہا حسب عادت شور مچاتی آئی۔کرتے کو توصیفی انداز سے دیکھتئ پسند کی مہر لگاتی

نہیں میں تو اپنے لیئے۔ 

مزنہ نے اسکی غلط فہمی دور کرنی چاہی مگر جلد باز ماہا مڑ کر سیلز گرل سے شروع ہوچکی تھی۔

مجھے یہ والا کرتا دکھائیں کونسا سائز بیسٹ رہے گا ہاییٹ ویسٹ بس کچھ اسی جیسی چاہیئے عادل کا بس ایک آدھ نچ ہی قد ذیادہ ہے مزنہ سے۔ 

سیلز گرل سے مستقل بولتے ہوئے وہ یہی کرتا نکلوا رہی تھی۔

پھر بل بنواتے تک بولتے بالتے اسے کائونٹرپر جیولری پسند آگئ

نازک سے زنجیر میں جھل مل کرتے نگینے جڑے آویزے۔۔ چین اتنی باریک تھی کہ دور سے دیکھنے پر لگتا نگینے ہوا میں معلق ہیں۔ 

یہ کیسے ہیں۔ کانوں میں سجا کر وہ اسکو دکھا کر پوچھنے لگی

جانے جگر جگر کرتے ہیرے جیسے نگینوں کی جھلملاہٹ تھی یا اسکے گالوں میں پڑتے ڈمپل سے اسکے چہرے ہر جگمگاہٹ تھی وہ بے تحاشا حسین لگ رہی تھی۔

بتائو نا کیسی لگ رہی ہوں میں؟ 

ماہا نے ٹوکا 

بہت پیاری بے حد حسین۔

اس نے دل سے کہا تو وہ پھر کھلکھلا دی۔ اسکا حسن دو آتشہ سا ہو چلا

مزنہ نے سنبھل کر اسکے گال پر جھولتی اس آوارہ سی لٹ کو احتیاط سے اسکے کان کے پیچھے اڑس دیا۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ روبیہ اور لیلی کے ساتھ کینٹین میں گپ شپ کرتی سموسہ چاٹ اڑا رہی تھی جب شمائلہ اپنے گروپ کے ہمراہ بن بلائے مہمان کی طرح نازل ہوگئ۔

تمہاری بہن تو بڑی سپر اسٹار نکلی۔ اوہ۔ وہ جان کے اٹکی۔ 

معاف کرنا سپر اسٹار نکلا۔ پوری ٹک ٹاک پر ٹرینڈنگ میں آرہا ہے۔ ہمیں پتہ ہوتا تو اس دن روک کرآٹوگراف لے لیتے۔۔ 

وہ آنکھیں مٹکا مٹکا کر چمک چمک کر بول رہی تھی۔اسکی سہیلیاں کھی کھی کرنےلگیں۔

میں تو کندھےسے لگ کر تصویر بھی بنوا لیتی ۔۔ اسکی سہیلی نے لقمہ دیا

ارے امی کو کیا بتاتیں کس کے کندھے سے لگ کر تصویر بنائئ ہے لڑکی یا لڑکا۔

یہ ہما تھی کہتے ساتھ ہی ہنسے چلی گئ۔ 

کیا بد تمیزئ ہے یہ شمائلہ۔ 

کنزی کا طیش سے منہ سرخ ہو چکا تھا۔ اسکا ہاتھ دبا کرروکتے ہوئےلیلی بولی تھی۔ 

بد تمیزی؟؟؟ ارے ہم تو تعریف کر رہے تھےسچی ہمیں نہیں پتہ تھا اسکی بہن ہیرو آتی ہے ٹک ٹاک پر۔

شمائلہ نے بھولا بن کراپنا موبائل اسکی نگاہوں کے سامنےلہرایا۔

کیا بکواس کر رہی ہو۔کنزی دونوں ہاتھ میز پر مارتی غضب کےمارےاٹھ کھڑی ہوئی

بکواس تعریف کر رہی ہوں دیکھو کتنا اچھا ایکٹر ہے تمہارا بھائئ۔ میرا مطلب بہن۔ 

شمائلہ کے چہرے پر چڑا دینےوالی مسکراہٹ تھی۔اسکا موبائل نگاہوں کے سامنے تھا کنزی نے تھامنا چاہا مگراس نے موبائل چھوڑا نہیں بلکہ ویڈیوچلا بھئ دی۔

مشہور بھارتی گانے پر وہ لڑکی بہت جھوم جھوم کر اس لڑکے کے کندھے سے لٹک لٹک کر گا رہی تھی۔لڑک بھی خوب موج میں اسے احتیاط سے تھام رہا تھا۔ لڑکے کی بس ایک دو بار جھلک ہی آئی تھی۔ویڈیو کےآخر میں دونوں نے اپنی پیشانیاں ٹکائیں اور رومانوی پوز دیا۔۔۔ لڑکی کو وہ نہیں جانتی تھئ مگرلڑکا وہ لاکھوں لوگوں میں پہچان سکتی تھی۔ وہ لڑکا۔ کوئی اور نہیں اسکی اپنی سگی ماں جائی تھی

وہ پتھرا سی گئ۔

کینٹین میں موجود سب لڑکیوں کی توجہ انکی جانب ہونے لگی

شمائلہ نے استہزائیہ انداز سے دیکھتے ویڈیو دوبارہ پلےکردی

بھئی مبارک باد دو کنزی کی بہن مشہور ہوگئ ہے ٹک ٹاکر کے طور پر۔ 

شمائلہ کی سہیلی نے اعلان کر ڈالا۔ لڑکیاں فورا متوجہ ہوئیں

یہ لڑکی کنزی کی بہن ہے؟ جانے کس نے پوچھا

نہیں یہ لڑکی نہیں اس ویڈیو میں جو لڑکا ہے وہ۔۔

شمائلہ اس تماشےسے بہت محظوظ ہورہی تھی۔ روبیہ اور لیلی نےکنزی کا ہاتھ پکڑ کر اس جمگھٹےسے نکلنا چاہا۔

کیا ہوا؟ کنزی کا بھائی ٹک ٹاکرہے؟ 

ایک لڑکی اسکو روک کرپوچھ رہی تھی

ارےکنزی کا بھائی نہیں بہن ہے ۔۔ اسکی بہن لڑکوں جیسی لگتی ہے۔ 

جانےکون اعلان کر رہی تھی کنزی نے اپنا چہرہ دونوں ہاتھوں میں چھپا لیا۔روبیہ اور لیلی کتنے جتنوں سے اسے کھینچ کھانچ کر کینٹین سےباہر لے کر آئیں۔سائکالوجی ڈیپارٹمنٹ کے بیک سائیڈ اس وقت سنسان ہو تی تھیں دونوں اسے تھام کر وہیں لے آئیں۔ دیوار سے لگ کر بیٹھتے وہ پھوٹ پھوٹ کر رو دی۔ 

مت روئو۔ شمائلہ کی عادت تو جانتی ہو۔ ایسا بھی کچھ عجیب نہیں یہ ٹک ٹاکر انیتا اسکومیں بھی فالو کرتی ہوں اسی یونیورسٹی میں پڑھتی ہے جسمیں مزنہ آپی پڑھتی ہیں۔بنوا لی ہوگئ ویڈیو۔شمائلہ کا پتہ تو ہےتمہیں ہے ہی سڑی ہوئی جل ککڑی۔۔ 

لیلی اسکو بہلانےکو جو سمجھ آرہاتھا کہے جا رہی تھی۔

اسی مانوس گانےکی آواز سنائی دی تو لیلی نے گھور کر روبیہ کو دیکھا۔وہ سنجیدہ سی شکل بنائےویڈیودیکھ رہی تھی گڑ بڑا سی گئ۔ کنزی نے بھی سر اٹھا کر دیکھا۔ 

وہ میں بس دیکھنا چاہ رہی تھی کمنٹس۔ 

روبیہ نے صفائی دینا چاہی۔ کنزی نے دوپٹےسے آنسو پونچھے اور اسکا موبائل ہاتھ میں لیکرخود بھی کمنٹس پڑھنے لگی۔

ان لوگوں نے اس دن کم تماشا لگایا تھاجب مزنہ آپی اسکو چھوڑنے آئی تھیں۔ اب تو انکوپکاموقع ملا ہے

 روبیہ گہری سانس لیکر بولی

یار عجیب سائکو ہیں  یہ۔ہمیشہ لیٹ کالج آتی ہیں اس دن کنزی لیٹ ہو گئ تو دیکھ لیا ورنہ کتنی دفعہ تو مزنہ آپی اسے چھوڑ کر گئ ہیں لینےتو اکثر ہی آتی تھیں گارڈ تک پہچانتا انکو انہوں نےاس دن ایسے تماشا بنا دیا تھا جیسے

لیلی کو شمائلہ پرشدید غصہ آرہا تھا۔

کنزی خاموشی سے کمنٹس پڑھنے لگی۔

یہ لڑکی سائیکوہی ہے۔۔یونیورسٹی بھی ایسے ہی آتی ہے۔ 

یہ ہجڑا ہےکیا ؟؟؟؟ 

یہ دیکھنے میں تو کہیں سےلڑکی نہیں لگ رہی۔۔ 

یہ لڑکا ہے ۔۔اسکی۔۔۔۔۔۔۔۔ 

یہ تو گے کپل ہے۔۔۔

اسکے کانوں کی لوئیں تک سرخ ہونے لگیں 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کالج سے آکروہ جلے پیرکی بلی کی طرح پھری تھی۔ امی نے سب ناراضگئ بالائے طاق رکھ کر اسکی بے چینی کا سبب بھی پوچھا مگر وہ سیدھا کنزی سے ہی بات کرنا چاہتی تھی۔امی اسے اسکےحال پر چھوڑ کر نماز کی نیت باندھنے لگیں۔

وقت گزرتا گیا شام کی چائےبن گئ۔ اس نے مزنہ کو فون کھڑکایا اس نے اٹھایا ہی نہیں ۔امی اطمینان سے آکر لائونج میں آٹھ بجے کاڈرامہ دیکھنے لگیں

وہ سنجیدگی سے انکے پاس آن بیٹھی۔

امی کی یونہی نظر پڑگئی تو تشویش سے پوچھنے لگیں

کیا ہوا کنزی۔۔ 

امی کا پوچھنا غضب ہو گیا۔ وہ بل کھا کر بولی

امی آٹھ بج رہے ہیں کنزی ابھی تک گھر نہیں آئی۔ 

امی نوٹس لیئے بنا بولیں۔

آتی ہوگی آج یونیورسٹی کے بعد ماہا کے ساتھ کہیں جانا تھا۔ اسے۔

ایک یہ ماہا آپی۔ مانا بچپن کی دوست ہیں مزنہ کی مگر ڈرائیور کی طرح پیش آتی ہیں مزنہ کے ساتھ۔ کہیں جانا فون کھڑکا دیا یہ بائک لیکر حاضر ہیں۔ لڑکیوں والی دوستی تو نہیں نبھاتیں الٹا مزنہ کو مستقل لڑکوں کی طرح ٹریٹ کر کرکے اور اسکا دماغ خراب کر دیا ہے۔ 

امی ہنس دیں۔

ہاں اسکا فون آیا تھا کنزی کے فون پر کنزی باتھ روم میں تھی تو میں نے اٹھا لیا کہہ رہی تھی۔ جانو بھول گئے آج ہم نے صدر جانا تھا مجھے تو اتنی ہنسی آئی اسکے ایسےبولنے پر اور وہ میری آواز سن کر اتنی شرمندہ ہا ہا ہا۔

دیکھا۔کنزی اپنا اندازہ درست ثابت ہونے پر تیز ہو کر بولی

اب انہوں نے صدر جانا تھا اور مزنہ انکے لیئے ڈرائیور ڈیوٹی کرے گی کیوں بھلا؟۔

ارے پرانے تعلقات ہیں۔ واحد تو دوست ہےمیں تو شکر کرتی ہوں ایک ہی سہی لڑکی دوست ہے ورنہ اسکا یاد ہے لڑکپن تک لڑکوں کے ساتھ ہی کھیلتی تھی آئوں گا جائوں گا کہتی تھی اب تو۔۔۔ امی کے ڈرامے میں اشتہار آگئے تھے سو فرصت سے بیٹی سے بات سے بات بڑھانے لگیں۔کنزی کو سمجھ نہ آیا کیسے بتائے۔سو بات بدل کر گھڑی کی جانب اشارہ کرنے لگی

اور وقت دیکھیں۔کبھی آپ نے مجھے اور حفصہ آپی کو تو اتنی رات گئےکہیں آنے جانے نہ دیا۔ حفصہ آپی کی تو شادی بھی ہو چکی ہےپھر بھی انکو آپ شام میں رکشے تک میں اکیلے نہیں جانے دیتیں ہمیشہ عامر بھائی  آتے پھر اسے کیوں نہیں ٹوکتیں۔ ساڑھے آٹھ ہو رہے ہیں کوئی اتا پتہ نہیں اسکا۔

امی اسکا لال بھبھوکا چہرہ دیکھتی ہی رہ گئیں پھر سبھائو سے سمجھانے لگیں۔

مزنہ ماشا اللہ سے سمجھدار بہادر لڑکی ہے اپنی موٹر سائکل لیکر گئ ہے..

امی لڑکیاں بہادر نہیں ہوتیں ہونا نہیں چاہیئے ہوں بھی تو لڑکی کو لڑکی تو لگنا چاہیئے یہ دیکھیں۔ 

اس نے غصے کے مارے ویڈیو نکال کر دکھا دی۔

کیسی ویڈیوز بنا رہی ہیں لڑکیاں یہ منگیتر بھی ہے اگر اسکا تو یوں لپٹنا۔۔ 

امی پہچانی ہی نہیں۔

غور سے دیکھیں امی یہ لڑکا نہیں ہے مزنہ ہے۔ 

کنزی نے سر پیٹ لیا۔

اچھا ہاں۔وہ مسکرا دیں۔

میں ماں ہو کر دھوکا کھا گئ ما شا اللہ میری مزنہ

اوفوہ امی۔ کنزی جھلا کر چیخ پڑی

ذرا کمنٹ کھول کر دیکھیں کیا کہہ رہے ہیں لوگ مزنہ کے بارے میں ہجڑا تک کہہ رہے ہیں اسے۔ اور آپ خود دیکھیں مزنہ بالکل بھی لڑکیوں جیسی نہیں ہے بولتی چلتی پہنتی اوڑھتئ سب لڑکوں کی طرح ہے لڑکی کہو تو غصے میں آجاتی ہے۔ بولتے بولتے اسکی نگاہ بائک کی چابی جھلاتی مگن سی لائونج میں داخل ہوتی مزنہ پر پڑی۔ مردانہ گہرے رنگ کی ۔ ٹی شرٹ جینز میں ملبوس دوپٹہ ندارد۔ہاتھ میں شاپر پھر کسی دکان کے چکر لگا کے آئی تھی۔مزید لوگ مزید الٹی سیدھی باتیں

چڑ کر کہہ دیا

اور یہ تو دوپٹہ تک نہیں اوڑھتی۔ باہر پھر پھر کر چہرے تک پر سختی آچکی ہے اسکےلڑکی لگتی ہی نہیں ہے اب۔

کیا فضول باتیں کر رہی ہو کہاں سے فضول باتیں ذہن میں آرہی ہیں تمہارے۔ 

امی کی پشت تھئ پھر بھی لاڈلی بیٹی کی حمایت میں کنزی پر خفا ہونے لگیں۔ ۔کنزی کو دیکھتےمزنہ وہیں رک کر سننے لگی تھی اب ماتھے پر کئی شکنیں بھی ابھر آئی تھیں۔

کنزی اٹھ کر کھڑی ہوگئ۔ 

یہ فضول باتیں نہیں ہیں۔ امی اسکو سمجھائیں یہ لڑکی ہے لڑکی رہے لڑکا بننے کی کوشش میں بیچ میں ہی نہ۔

بکواس بند کرو۔ مزنہ بھاری آواز میں چلا اٹھی۔

جتنا مرضی چلائومگر حقیقت سے نظر نہ چرائو تم دوپٹہ اوڑھو نہ اوڑھوآئوں گا جائوں گا کرو نہ کرو تم لڑکی ہو لڑکی رہو گی

کنزی بے خوفی سے دوبدو تھئ۔مزنہ طیش کے عالم میں اسکی جانب بڑھی۔ امی گھبرا کر مزنہ کو روکنے لگیں

ہوش کرو وہ تو چھوٹی ہے نادان ہے جانے کس کی باتوں میں آگئی

امی کے جملے اسے تیر کی طرح چبھے

چھوٹی ہوں نادان نہیں۔ آپ نادانی کر رہی ہیں۔کچھ اندازہ ہے آپکو لوگ پیٹھ پیچھےاسے سائکوخبطی پاگل کیاکچھ نہیں کہتے اور اب اس ٹک ٹاک والے کارنامے کے بعد تو ہجڑا اور گ۔۔ وہ فرط شرم سے چپ کر گئ

بولو کیا کہتے۔ مزنہ دانت کچکچا رہی تھی۔۔

گھر میں اتنی زبان چلتی ہے باہر جواب کیوں نہیں دیتیں تم

امی ان دونوں کو روکتے جھلا گئئیں۔

کس کس کو جواب دوں ؟کنزی چلائی تو کئی آنسو گال پر امنڈتےچلے آئے

کس کس کو روکوں۔ خالہ عامر بھائی محلے والے اور میری سہیلیوں تک تو منہ درمنہ مقابلہ کیا اب تو اسکو انجان لوگ تک۔ آپکو احساس کیوں نہیں ہوتا یہ غلط ہے شرم آتی ہے جب لوگ اسکو ۔۔ 

تو تمہیں بھی میرے وجود سے شرمندگی ہو تی ہےحفصہ کی طرح۔ ؟ تم چاہتی ہو میں تمہاری طرح نزاکت سے چلا کروں ہر وقت دوپٹے میں الجھی رہا کروں شلوار پہن کر بائک چلایا کروں؟؟

مزنہ دھاڑی۔ آنکھوں میں سرخ ڈورے بھاری آواز امی بھی ٹھٹک کر اسے دیکھنے لگیں۔۔کنزی ہونٹ بھینچ کر رہ گئ۔

بات سنو مزنہ۔ امی نے پیار سے اسکا بازو تھام کر سمجھانا چاہا

کچھ نہیں سننا میں نے خوب سمجھ رہی ہوں میں اسکا مسلئہ۔مگر یاد رکھو میں جیسی بھی ہوں لڑکوں جیسی یا ہجڑوں جیسی ہر طرح سے تم سے بہتر ہوں۔یاد رکھو ایک درزی سے جوڑا لانے تک کیلیئےتم اسی مزنہ کی محتاج ہو۔ اگر لڑکیاں تم جیسی ہوتی ہیں تو میں لڑکا ہی ٹھیک ہوں۔

وہ مزنہ کا جوڑا ہی درزی سے لائی تھی۔ ہاتھ میں پکڑا شاپر 

کنزی پر اچھال کر حقارت بھرے انداز میں کہتی مزنہ کنزی کو اتنی مختلف اور اجنبی لگی کہ چند لمحے دیکھتی ہی رہ گئ

بہن کو غلط مت سمجھو بیٹا۔ اتنا غصہ مت کرو میری اچھی بیٹئ ہو نا تم

امی لجاجت سے بولیں تو وہ لمحہ بھر کو خاموش ہو کر انہیں دیکھنے لگی۔ اپنی پیشانی مسل کر خود کو ٹھنڈا کیا جیسے۔اس بات ہموار مگر اٹل لہجے میں بولی۔۔

بیٹی نہیں بیٹا ہوں میں امی آپکے ہادی کا پرتو۔میں لڑکا ہوں آپکا بیٹا۔اس حقیقت کو جتنی جلدی ہوسکےباور کرلیں۔ 

وہ کہہ کر رکی نہیں پیر پٹختی کمرےکی جانب بڑھ گئ

کنزی تو کنزی امی بھی سناٹے میں آگئ تھیں۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بیڈ کرائون سے ٹیک لگائے وہ سنجیدہ سی شکل بنائے موبائل میں مگن تھی۔ جب امی تھکی تھکی سی کمرے میں داخل ہوئیں۔

جانے کس کی نظر لگ گئ ہے ایسا گھل مل کے بیٹھی رہتی تھیں میری بیٹیاں اب ہر وقت کا جھگڑا۔ 

امی اسے ڈانٹنے ڈپٹنے کے موڈ میں تھیں مگر وہ بے نیازی سے موبائل میں لگی رہی۔

جانے دوپہر کو کچھ کھایا یا شام کو میں نے اتنا پکارا تو دروازہ کھول لیا مگر کھانا کھانے کو تیار نہیں ہوا یہ جا کر دوبارہ منہ تک چادر تان کے لیٹ گیا ہے۔ 

امی بولتی ہوئی کمرے کی چیزیں سمیٹ رہی تھی

کھانے کو تیار نہیں ہوئی، دوبارہ منہ تک چادر تان کر لیٹ گئ ہے۔

وہ جتانے والے انداز میں چبا چبا کر بولی

امی آپ تو میری بات سمجھنے کی کوشش کریں۔ موبائل ایک طرف رکھ کر وہ سیدھی ہو بیٹھی

کیا سمجھوں ۔امی چڑ گئیں۔

تم تو ایسی نہ تھیں اتنی پیاری بیٹی تھیں۔بہن سے اتنا پیار کرتی تھیں جب کوئی کچھ اسے کہتا تھا تو لڑنے مرنے پر تیار ہو جاتی تھیں آج کیا کچھ نہ سنا دیا تم نے اسے۔

بالکل میں اب بھی وہی ہوں۔ امی۔ مگر آج جب کوئی اسے کچھ کہتا ہے تو مجھے یہ سمجھ بھی آرہا ہے کہ اس نے موقع دیا ہے دنیا کو باتیں بنانے کا۔ ایک دنیا کی لڑکیاں کیا کچھ نہیں کرتیں جہاز اڑاتی ہیں ، پہاڑ کی چوٹی سر کرتی ہیں سب کیا اپنی چال ڈھال حلیہ بدل لیتی ہیں؟ اسکو لڑکی کہہ دو تو اسے گالی کی طرح لگتا ہےامی یہ نارمل رویہ نہیں ہے خدا کاواسطہ ہے میری بات سمجھنے کی کوشش کریں۔ 

مجھے یہ سمجھ نہیں آرہا کہ یہ بچپن سے ایسی ہے اب اچانک کیوں تمہیں اس میں اتنے کیڑے نظر آنے لگےہیں۔

امی ناراض ہوگئیں۔ 

کنزی سر تھام کے رہ گئ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

صبح وہ کب اٹھی کب باہر چلی گئ انہیں پتہ نہ لگا۔وہ اتوار کی وجہ سے گیارہ بجے اٹھیں۔ کنزی کو جگایا اسے اٹھانے کمرے میں آئیں تو وہ گھر میں نہیں تھی۔ بائک بھی نہ تھی۔ 

ابھی فون کرکے پوچھنے کا سوچ ہی رہی تھیں کہ بائک پورچ میں آرکنے کی آواز آئی۔ وہ کچن سے تجسس میں باہر لائونج میں چلی آئیں تو داخلی دروازے سے حفصہ اور مزنہ اکٹھے اندر آرہی تھیں۔ 

اسلام و علیکم امی۔ 

وہ خوشگوار انداز میں آکر ان سے لپٹ گئ۔ 

وعلیکم السلام۔ کیسی ہو پورے دو ہفتے بعد ماں یاد آئی تمہیں ہیں۔ 

بیٹی کو کلیجے سے لگا نے پر ڈھیروں ٹھنڈ سینے میں پڑی تھی پھر بھی ہلکا پھلکا شکوہ کر ہی ڈالا۔ جوابا حفصہ کھلکھلائی

اف آپکو نہیں پتہ کتنی مصروفیت رہی ہے آخر کار خوشخبری ہے میرے پاس مگر امی پہلے اچھا سا پراٹھا بنا کر کھلائیں قسم سے پیٹ میں چوہے کود رہے ہیں۔

وہ بچوں کی طرح ٹھنکی۔ 

امی مجھے بھی ناشتہ کرادیں۔آپی نے نہار منہ بلوا لیا گیٹ پر انتظار میں کھڑی تھی بس جیسے ہی پہنچا بیٹھ کے واپس یہاں لے آئیں پانی تک کو نہ پوچھا۔

مزنہ اپنے ہمیشہ کے انداز میں بولتی ہوئی لائونج میں ٹی وی چلا کر صوفے پر گر گئ۔امی نے چونک کے شکل دیکھی۔نارمل انداز تھا رات والی تلخی کا شائبہ تک نہ تھا۔امی محبت سے مسکرا دیں

کیا کرتی امی  ردا  اپنی دادو اور اپنے تایا کے بچوں کے ساتھ کل سے اپنی پھپو کے گھر گئ ہوئی ہے۔ یہ صبح صبح گاڑی لیکر نکل گئے لاہور جانا تھا انہیں اب میں اکیلی تھی۔ کیا اپنے لیئے اہتمام کرتی سوچا آج ماں کے ہاتھ کا پراٹھا کھائوں۔

حفصہ لاڈ سے ماں کے کندھے سے جھول گئ

بس دو منٹ میں بناتی ہوں اپنی بیٹیوں کیلئے پراٹھے۔جائو کنزی کو بھی اٹھا لائو۔ امی کہتی فورا کچن میں گھس گئیں۔ حفصہ نے آلو کی ترکاری تیار کی گرم گرم پراٹھے۔کنزی اٹھ آئی تو بہن سے لپٹ گئ۔ ہنستے بولتے اسی نے چائے بنا دی۔ اہتمام سے جب ناشتہ کرنے بیٹھیں تب تک مزنہ آرام سےٹی وی کے چینل بدلتی رہی

اب مزنہ کو بھی گھر کے کاموں میں لگائیں کم از کم چائے تو بنانئ سیکھ لے۔ 

حفصہ نے تو یونہی بات کی مگر امی بری طرح سٹپٹا گئیں۔ او رآنکھ کے اشارےسے اسے چپ ہونے کا کہنےلگیں۔مزنہ تو بے نیازی سے ناشتہ کرتی رہی جیسے سنا ہی نہ ہو کنزی کے چہرےپر بڑی جتاتی مسکراہٹ آئی تھی۔ 

اتوار کے دن کے حساب سے کئی کام منتظر تھے مگر سر فہرست سودا سلف لانا تھا۔حفصہ کو اپنے ہاتھ کی بریانی کھلانے کیلئے انہوں نے فٹا فٹ سودے کی فہرست مزنہ کے حوالے کی وہ فورا بائک لیکر نکل گئ کنزی کو اپنا ادھورا اسائنمنٹ مکمل کرنا تھا سو کمرے میں گھس گئ

 حفصہ جو بات کرنے آئی تھی  اسکے لیئے اسے یہی وقت مناسب لگا۔امی کو لیکرلائونج میں آ بیٹھی۔

امی ابھی خالہ نے سب کو اطلاع نہیں دی مگر سعدیہ کا رشتہ طے ہو گیا ہے۔ اب جانے وہ کرامت والے بابا کا تعویز اثر کر گیا کہ کیا جھٹ پٹ سب کام ہو رہے ہیں ۔لڑکا اکلوتا ہے دبئی میں رہتا ہےباپ نہیں ہے ماں بھی ساتھ رہتی ہے ۔ اچھے لوگ ہیں۔

شکر ہے خدا کا۔بہت پریشان تھی میری بہن۔ اللہ نے اسکی مشکل آسان کی۔ شکر الحمد اللہ۔۔

امی کے دل سے بے ساختہ شکر نکلا۔ بھانجی انکی حفصہ سے بھی دو مہینے بڑی تھی مگر قسمت نہیں کھل رہی تھی۔حفصہ مسکرا دی۔ امی ہمیشہ سے ہی اتنی رقیق القلب تھیں اس دفعہ تو حفصہ کی وجہ سے ڈھیروں دعائیں انہوں نے بھی سعدیہ کیلیے کی تھیں جو مقبول ہوگئیں ۔جتنا شکر کرتیں کم تھا۔

اور ایک اور خاص بات امی۔ حفصہ کو اصل بات کرنے کی جلدی بھی تھی۔ڈر یہی تھا کہ مزنہ نہ آجائے اس سے پہلے بات کرلے

مزنہ کیلئے رشتہ ہے۔میری سہیلی کا دیور ہے۔میری شادی کی سالگرہ پراسکی ساس کی آپ سے اور کنزی سے ملاقات ہوئی تھی۔ ہمارا گھرانہ پسند آیا ہے انہیں۔انہوں نے توبات کنزی کی کی تھی مگر میں نے بتایا کہ ابھی تو فرسٹ ائیر کا امتحان دیا ہے کم ازکم گریجوایشن سے پہلے اسکا نہیں سوچنا تو خود ہی انہوں نے مزنہ کا ذکر کر ڈالا۔مزنہ بھی کم پیاری نہیں ہے بس اسکو لڑکیوں والے کپڑے پہنوا کر کسی دن انکو ملنے بلا لیں۔لڑکا عمر میں مناسب ہے اپنا کاروبار کر رہا ہےپڑھے لکھے لوگ ہیں۔ 

ایک ہی سانس میں سب سنا کر وہ بمشکل سانس لینے رکی تھی۔اتنا جوش و خروش دیکھ کر بھی امی ہچکچاہٹ کا شکارہوئیں۔

مگر بیٹا ابھی مزنہ شائد تیار نہ ہو شادی کیلئے۔

حفصہ تیز ہو کر بولی

کیوں نہیں؟  آخری سمسٹر ہے یونیورسٹی کا شادی طے ہو بھی جائے تو سال چھے مہینے لگ جائیں گے فارغ ہو جائے گی ڈگری سے۔۔ 

پھر بھی۔ ویسے بھی اس نے سارا گھر سنبھال رکھا ہے۔ 

امی گومگو میں تھیں کہ حفصہ کوکل والی لڑائی اور مزنہ کے مکالمے بتائیں نہ بتائیں۔جانے وہ واقعی ایسا سوچنے لگی ہے یا غصے میں کہہ گئ ہے۔ سمجھ نہ آیا تو بودا بہانہ تراش لیا۔ حفصہ کچھ اور ہی سمجھی

سارا گھر سنبھال لیا ہے تو کیا اسکی شادی ہی نہیں کریں گی؟ اور لڑکیاں گھر کے کام کرکے گھر سنبھالتی ہیں باہر کے کام کرکے نہیں

امی بے بسی سے اسکی شکل دیکھنے لگیں

بیٹا دکانوں کا حساب کتاب سب وہی دیکھتی ہے اور وہ تو کہتی ہے ڈگری کے بعد نوکری کرے گی 

امی بس کریں۔حفصہ جھلا گئ

ایک دنیا کی خواتین اپنے کام خود کرتی ہیں۔ آپ نے اچھا باہر کی دنیا کو ہوا بنا رکھا ہےاور اس چکر میں اسے بھی عجوبہ ماہی منڈا بنا دیا ہے۔ امی بیٹی ہے آپکی وہ۔ بیٹا نہیں۔ اگر عام سی لڑکی ہوتی تو پھر چلو دو چار سال ٹال جاتے اسکی شادی کا سلسلہ مگر اسے دیکھیں ذرا بالکل لڑکا بن کے رہ گئ ہے۔ابھی کم عمر ہے رعب میں ہے آپکے ڈانٹ ڈپٹ کر شادی کردیں یہ ماہی منڈا پن سب بھول بھال جائے گی  اسے ابھی اسکے حال پر چھوڑا تو بالکل ہاتھ سے نکل جائے گی۔

پہلے کنزی اوراب حفصہ دونوں کی ایک ہی بولی۔ انکو تو لگنے لگا تھا تمام عمر بس گھاس ہی کھودی ہے سب عقل شعور انکی بیٹیوں نے گھول کے پی لیا ہے۔

امی خود غرض نہ بنیں معاملے کو سمجھیں۔ حفصہ انکی طوہل خاموشی سے جھلا گئ

ابھی میری ساس اور شوہر نے ہمارے گھرانے کا بائکاٹ کردیا ہے نا خود آتے ہیں نہ ردا کو آنے دیتےہیں مجھے روک سکتے تو شائد میرا آنا بھی بند کرا دیتے۔طرح طرح کی باتیں بن رہی ہیں امی۔لوگ کہتے ہیں آپ مزنہ کی اب کبھی شادی ہی نہیں کریں گی۔آپکو کیا پتہ خاندان والے تک مزنہ کے بارے میں کیا کہہ جاتے حالانکہ بچپن سے دیکھ رہے ہیں اسے۔ 

دبے لفظوں میں اس نے خانداں میں پھیلی چہ مگوئیوں کا بھی تذکرہ کر ڈالا۔ 

امی ٹکر ٹکردیکھتی رہیں  یہ وقت بھی آنا تھا کہ انکی اپنی اولاد خود غرضی کے طعنے دے گی۔ سوچتی رہیں۔پھرتھک کر بولیں

نہیں خود غرض تو نہیں ہوں میں۔ چلو بلا لو کسی دن انکو مل لیتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ختم شد۔ 

جاری ہے۔۔

مجھ میں ہی ہے رنگوں کی کمی۔۔
قسط 1

اٹھ جائو کنزی مزنہ ۔ اٹھا اٹھا کے تھک گئ میں۔دیر ہو جائے گی تم لوگوں کو آٹھ بج رہے ہیں۔۔
تھپا تھپ پراٹھے کو بڑھا کر توے پر ڈالتے ہوئے صفیہ اونچی آواز میں پکار رہی تھیں۔
یونیفارم میں نک سک سے تیار ہوکر سنگھار میز کے سامنے بال بناتی کنزی نے کمرے سے ہی آواز لگائئ۔
اٹھ گئ ہوں امی یہ مزنہ سوئی پڑی ہے ابھی تک۔
اس کی تیز آواز پر برابر ہی بیڈ پر سوئی مزنہ کسمسا کر اٹھی۔ گھور کر دانت پیستی آنکھیں ملتی۔
مزنہ اٹھ جائواور مجھے کالج بھی چھوڑ آئو پلیز۔
اسکی سب گھوریاں نظر انداز کرتی پونی باندھ کر کنزی اسکے پاس آبیٹھی۔
مزنہ نے سائیڈ ٹیبل سے موبائل اٹھا تے ہوئے ایک بار اور گھورا۔
شرافت سے وین کا کرایہ پکڑو اور جائو۔
پلیز نا میں لیٹ ہو جائوں گئ نا بہن نہیں ہو۔
کنزی اسکا گھٹنا پکڑ کر منت بھرے انداز میں کہہ رہی تھی۔اس پر ذرا اثر نہ ہوا۔بے مروتی سے بولی
راستہ ناپو میں نہیں لے جارہا پورا شہر گزار کر کالج ہے تمہارا تمہارے چکر میں میں لیٹ ہوجائوں گا۔
امی دیکھیں نامزنہ کو صاف انکار کر رہا ہےمجھے چھوڑ کر نہیں آئے گا اب اتنا تیار ہو کر میں لوکل وین سے نہیں جا سکتی میرا وین والا بھی آکر جا چکا تب میں تیار نہیں ہوئی تھی۔۔ امی اس سےکہیں نا۔۔
اسکی ساری منتیں نرمی بھک سے اڑ گئیں فورا اٹھ گئ۔چلا کر پیر پٹخ کر شکایت لگانے لگی
ارے ارے۔ مزنہ اسکے انداز پر اٹھ بیٹھی
۔امی پراٹھہ ہاٹ پاٹ میں رکھ کر دوپٹے سے ہاتھ پونچھتی یہیں چلی آئیں۔
اب تو بالکل نہیں لیکر جائوں گا دیکھ لینا۔اس نے منہ پر ہاتھ پھیرا تو کنزی منہ چڑانے لگی۔
امی نے آتے ہی اسکی یہی بات پکڑ لی۔
کتنئ بار کہا ہے یہ آئوں گا جائوں گا مت کیا کروبڑی ہوگئ ہو تم ۔نہ جانے کونسا منحوس وقت تھا جو یہ لڑکوں کی طرح بولنے کی عادت پڑی ہے اسے۔اور کنزی تم بھی اسی کی طرح
امی اس سے کہیں نامجھے بائک پر چھوڑ آئے۔میں وین سے ایسے نہیں جا سکتی
کنزی امی کے کندھے سے لٹک گئ۔۔
اتنا میک اپ تھوپ کے جانے کو کہا کس نے ہے اسے؟۔
بے موقع جھاڑ صبح صبح نئی ذمہ داری اس نے خاصا چڑ کر ٹوکا تھا
چھوڑ آئو نا بہن کو۔اسکی سہیلی کی سالگرہ ہے آج۔ اب تو کتنے دنوں کے بعد فرمائش کر رہی ہے۔
امی اسکا سر سہلاتے دلار سے کہہ رہی تھیں
کنزی منہ چڑانے لگئ تو وہ اسے گھور کر رہ گئ۔
امی اس بلی کا روز کا ڈرامہ ہے آج ویسے بھی پہلی دو کلاسیں فری ہیں میری میں لیٹ جائوں گا پھر کپڑے بھی استری نہیں میرے۔۔
سستی سے پیر سلیپر میں ڈالتے ہوئے وہ منہ پھلا کر کہہ رہی تھی انداز نیم رضامندانہ ہی تھا۔ امی کو اسکی فرمانبرداری پر پیار ہی آگیا۔۔ انکی تینوں بیٹیوں میں سب سے ذیادہ فرمانبردار یہی تھئ۔سو فورا کنزی کو حکم دے ڈالا
جائو جلدی سے بھائی کے کپڑے استری کردوجائو شاباش۔
انکی بات پر منہ بناتئ کنزی آخر میں ہنس پڑئ
اب خود ہی اس کلو کو بھائی کہہ دیاآپ نے۔
اسکی بات پرموبائل کو چارجنگ پر لگاتی مزنہ بھی مسکرا دی
اوہو ایک تو زبان بھئ پھسل جاتی ہے۔امی خفت ذدہ سی ہوئیں مگر آگے بڑھ کر مزنہ کا خفا خفا سا چہرہ ہاتھوں میں لیکر پیار سے کہنے لگیں۔
مگرسچ پوچھو تومیری آنکھ کا تارا ہے میری مزنہ۔۔تم دونوں سے ذیادہ فرمانبردار اور کام کاجو بیٹی ہے میری۔
مزنہ مسکرا دی۔ امی کا ہاتھ چومتی کنزی کو منہ چڑاتی باتھ روم میں گھس گئ۔
کنزی نے منہ بنا کر امی کو دیکھا
خیرہم دونوں بھی بہت کام کرتی ہیں آپا کو بھری سسرال بھیج رکھا ہے سارا وقت کچن میں گھسی رہتی ہیں۔۔ اپنے آدھے درجن دیوروں کا ناشتہ بناتئ ہیں وہ
اس نے بڑ بڑاتے ہوئے الماری سے اسکا مردانہ کرتا اور جینز نکالی امی کو اسکی عادت کا پتہ تھا اب اس نے لمبی تقریر جھاڑنی تھئ سو کان دبا کر نکل گئیں۔
اس نے مڑ کر دیکھا تو کمرہ خالی ہو چکا تھا۔سو کپڑے نکال کر لائونج میں استری اسٹینڈ کے پاس بڑ بڑاتی چلی آئی۔
اور میں تو جتنا بھی کام کرلوں گنتئ میں نہیں آتا۔ کھانا پکاتی ہوں برتن دھوتی ہوں صفائی ستھرائی بھی میرے ذمہ اوپر سے اس کالو کی خدمتیں بھی کرواتی ہیں مجھ سے۔
یہ کبھی میرے کپڑےپریس کرتئ ہے۔
دل لگا کراستری کرتے وہ اونچی آواز میں بڑ بڑا رہی تھی۔امی چائے بناتئ ان سنی کرتی رہیں۔
جب تک مزنہ تیار ہو کر آئی اسکا موڈ ٹھیک ہو چکا تھا۔امی کے ساتھ ناشتہ میز پر لگانے میں مدد بھی کروائی۔۔
ان دونوں کو ناشتہ کرتے چھوڑ کر امی اندر سے کچھ کاغذ اٹھائے چلی آئیں۔
مزنہ یہ آج بجلی کے بل کی آخری تاریخ ہے۔بنک سے پیسے نکلوا کر جمع کروادینا۔موٹر بھئ کل سے بہت آواز کر رہی ہے لگتا ہے جل جائے گئ یونیورسٹی سے واپسی پر مکینک لیتے آنااور حفصہ کے ہاں سے سوٹ لےآنا وہ سلوا چکی ہےمگر اسکا جانے کب آنا ہو دوکنزی کے ہیں دو تمہارے ایک میرا ہے۔
سر ہلا ہلا کر سنتی مزنہ سنجیدہ سی ہوگئ۔
باقی کام کردوں گامگر یہ حفصہ آپی کے گھر نہیں جا سکتا۔انکی ساس اور عامر بھائئ کا بس نہیں چلتاکہ مجھے دیکھ کے کچا چبا جائیں ایسا گھورتے ہیں جیسے میں کوئی عجوبہ ہوں۔
بولتے ہوئے آخر میں دکھی بھی ہوگئ۔
کنزی اور امی بھی چپ سی ہو کر ایک دوسرے کی شکل دیکھنے لگیں۔امی ذرا سنبھل کر بولیں۔
بس بیٹا سب کا اپنا ذہن ہوتا ہے۔تھوڑے سے دقیانوسی ہیں وہ لوگ۔۔ نہیں پسند انکو خود مختار لڑکیاں
انکی بات پر کنزی نے باقائدہ آنکھ پھاڑ لیں حیرت سے
لڑکی؟؟ کہاں سے لگتی ہے یہ لڑکی؟
ڈھیلے ڈھالے جدید مگرمردانہ طرز کے کرتے میں ملبوس اس نے اپنے کندھوں تک آتے بال کھینچ کر پونی میں باندھ رکھے تھے۔ میک سے مبرا دھلا دھلایا صاف مگر سپاٹ سا چہرہ۔ ناشتہ کرتے ہوئے وہ مردوں کی طرح ہی آستین چڑھائے بیٹھی ناشتہ کر رہی تھی۔انداز میں لاپروا مرد کا تاثر نمایاں تھا بہ نسبت نازک سی لڑکی کے۔
یہ لمبے بال تک اس میں لڑکیوں والی لک نہیں آنے دیتے۔آواز تک بھاری ہوچکی ہے اسکی امی اسکو بوائے کٹ کروانے دیں ہم بھائی ہی بنا لیتے ہیں اسے۔
وہ مزاق نہیں اڑا رہی تھی بس شرارت بھرے انداز میں کہہ رہی تھی۔ اسکی بات پر مزنہ نے جھٹ اجازت طلب نگاہوں سے دیکھا
بوائے کٹ کروالوں امی؟ سچی لمبے بال نہیں سنبھلتے مجھ سے؟
مگرامی سختی سے جھڑک گئیں۔
خبردار جو بالوں کو کٹوانے کا سوچاتمہیں قسم دی ہوئی ہے
خبردار جو کٹوائے۔
سختی سے کہتے ہوئے جب انہوں نے مزنہ کا چہرہ اترتا دیکھا تو لہجہ دھیما کرکے سمجھانے والے انداز میں بولیں
بیٹا لوگ باتیں بناتے ہیں۔کیوں لڑکوں کی طرح بولتی ہو چلتی ہو لڑکوں جیسے کپڑے پہنتی ہو۔سب مجھے خود غرض اور نا عاقبت اندیش ماں تک کہہ ڈالتے ہیں کہ اپنے کام نکلوانے کیلئےمیں نے تمہیں بیٹا بنا رکھا ہے کوئی ایک بیوہ ماں کی مجبوری نہیں سمجھتا۔
بولتے ہوئے انکی آواز بھرا گئ۔
سچ تو یہ ہے کہ مجھے پچھتاوا بھی ہوتا ہے مجھے تمہیں ٹوکتے رہنا چاہیئے تھا۔ بیٹی کبھی بیٹا نہیں بن سکتی۔ تمہیں بیٹوں کی طرح پال کر میں خود کو مجرم سمجھنے لگی ہوں۔ کل کو تمہیں بھی رخصت۔۔انہوں نے رونا ہی شروع کردیا تو دونوں بہنیں اٹھ کر ان سے دائیں بائیں لپٹ گئیں۔
میں تو مزاق کررہی تھئ ۔۔۔ سوری امی کنزی نےدونوں کان پکڑ لیئے۔
نہیں کٹوا رہا میں بال اور کپڑے بھئ لے آئوں گابس رونا بند کریں۔۔
مزنہ نے بازو کے حلقے میں لیا تو وہ بھی آنسو پونچھنے لگیں۔۔
جیتی رہو دونوں۔ انہوں نے دل سے دعا دی تھی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ ایک سرد سی بےرحم شام تھی جب انکو اپنے شوہر اور اکلوتے بیٹے کے ٹریفک حادثے میں گزر جانے کی اطلاع ملی تھی۔ بارہ سالہ عبدالہادی اپنے باپ کے ہمراہ بڑے شوق سے نئے جوتے لینے موٹر سائکل پر گیا تھا۔ ایک تیز رفتار ٹرک ان دونوں کی زندگی کا چراغ بجھا گیا۔ نفیسہ تو بالکل ہمت ہار بیٹھی تھیں۔چودہ پندرہ سالہ حفصہ ماں کو سنبھالنے کی اپنی سی کوشش کرتی تھی۔ مگر نفیسہ راتوں کو اٹھ اٹھ کر ہادی کو پکارنے لگ جاتی تھیں۔ چالیسیوں تک سب رشتے داروں نے حتی المقدور ساتھ نبھایا۔ گھر اپنا تھا اسی کا ایک حصہ اوپر کاکرائے پر چڑھا کر کچھ سرٹٹیفیکیٹس تھے ان سے ایک دکان خرید کرکرائے پر چڑھا کر زندگی کی گاڑی کھینچنی شروع کردی۔ جیسے تیسے عدت گزری اسکے بعد گھر کا معمولی سے معمولی کام بھی کرنے کیلئے جب گھر سے نکلنا پڑا تو گھبرا سی گئیں۔حفصہ کو ساتھ لے جانا شروع کیا تو لوگوں کی نظروں اور باتوں کا سامنا کرنا پڑا۔ سودا سلف لانا ہو کرایہ وصول کرنا انہوں نے حفصہ کو ساتھ لے جانا چھوڑ دیا۔ مگر اکیلے نکلنے کی بھی ہمت نہ ہوتی تھی۔ مزنہ نسبتا تیز اور ہوشیار تھی اور ابھی ذیادہ قد بھی نہ نکالا تھا۔ انہوں نے اسکو ہر کام میں اپنے ساتھ رکھنا شروع کیا۔ بڑھتئ عمر کی بچی کو ہادی کے پینٹ شرٹ پہنا کر لے جاتیں تو سب اسے بچی کی بجائے بچہ ہی سمجھتے۔ انہوں نے اسکو پھر بچہ ہی بناڈالا۔ بال بالکل چھوٹے چھوٹے کروادیئے عبدالہادی کے کرتے پاجامے پہنتے مزنہ نے اطوار بھی لڑکوں جیسے ہی اختیار کر لیئے۔ اسے ہر معاملے میں ساتھ رکھتے ایک وقت آیا کہ وہ ہر معاملے کو ان سے بہتر سمجھنے سنبھالنے لگی۔ مارکیٹ میں بھانت بھانت کے لوگوں سے نمٹتے انکو احساس بھی نہ ہوا کہ کب وہ بڑی ہونے لگی۔ لوگوں نے مردمارسہی مگر لڑکی ہی سنجھنا شروع کردیا۔ مزنہ پہلے گھبرائی پھر اس نے نظروں کے وار سے جھجکتے چھپتے انکا ڈٹ کر سامنا اور ڈپٹ کر مردانہ وار مقابلہ کرنا شروع کردیا۔ بڑھتے قد اور دبلی جسامت کے باعث وہ اس عمر میں جب لڑکیاں خود سے چھپنا شروع کرتی ہیں اس نے آنکھوں میں آنکھیں ڈال کر ڈپٹنا سیکھا۔ دوپٹہ اوڑھنے کی بجائے گلے میں مفلر ڈالنا شروع کیا رنگ برنگی شلوارقمیض کی جگہ پھیکے رنگوں کے مردانہ کرتے بنوانے لگی۔ بال بڑھانے ہی چھوڑ دیئے۔ قد نکالا تو وہ بھی تاڑ سا۔پانچ فٹ نو انچ کی لڑکی تو کیا ہی لگتی الٹا مردانہ چال اور حلیئے کے باعث بہنوں کیلئے بھائی کی طرح ہی ڈھال بن گئ۔ موٹر سائکل چلانا سیکھ لی۔ حفصہ کی شادی کا وقت آیا تو تن و تنہا سب معاملات خوش اسلوبئ سے سنبھال لیئے۔ دیگوں ٹینٹ سروس سے لیکر شادی ہال تک کا سب انتظام بیٹے کی طرح سنبھالا اگر وہ سچ مچ بیٹا ہوتئ تو انٹر میں ہونے کے باوجود سب کچھ اچھی طرح سنبھالنے پر صفیہ فخریہ اسکی تعریفیں وصولتیں ۔مگر حفصہ کی شادی میں جس طرح لوگوں نے اس کو دیکھ کر باتیں بنائیں۔ اسکو ہجڑا تک کہہ ڈالا۔ تب پہلی بارصفیہ کو اپنی غلطی کا احساس ہوا۔ مگر تب تک شائد بہت دیر ہوچکی تھی۔مزنہ انکے ہر طرح کی سختی کرنے ڈانٹ ڈپٹ اور پیار سے سمجھانے کے باوجود نا لڑکیوں والے کپڑے پہننے کوتیار ہوئئ نہ ہی لب و لہجہ بدلنے پر۔انہوں نے اسکو لڑکیوں کے ہی اسکول اور کالج میں پڑھوایا بال کٹوانے نہ دیے اب کندھوں تک آتے تھے کہ اس سے ذیادہ بڑھنے نہیں دیتی تھئ وہ مگر یونیفارم میں دوپٹہ لینے کے باوجود اسکی چال ڈھال ٹھٹکا دیتی تھی۔ لڑکیاں اس سے دور ہو جاتیں یا باتیں بناتیں۔لے دے کے بس ایک ہی اسکی دوست بنی۔اور ایسی بہترین دوست جو پہلے اسکول پھر کالج اور اب بی ایس میں یونیورسٹی میں بھی اسکے ساتھ تھئ۔جسے کنزی اور حفصہ کی طرح اس نے اپنے حفاظتی حصار میں لے رکھا تھا۔مگر کہیں کچھ ایسا ضرور تھا جو اسے خود بھی اب کھٹکنے لگا تھا۔ ابھی بھی بائک چلاتے اشارے پر رکتے وہ کتنی ہی عجیب نظروں کے حصار میں تھی۔ عادی ہو چکنے کا کہنے اور عادی ہوجانے میں یقینا جو بال برابر فرق تھا اسے ضرور محسوس ہوتا تھا۔
اس نے ہیلمٹ گرمئ کی وجہ سے پہن نہیں رکھا تھا جبھی اس وقت۔۔ اس نے اشارہ کھلتے ہی ایکدم بائک تیز چلا دی تھی۔ پیچھے اپنی دھن میں بیٹھی کنزی نے سنبھل کر اسکا کندھا دبوچا
کیا کرتی ہو ابھی گر جاتی میں۔
اسکے چلانے کا اس نے قطعی نوٹس نہ لیا بائک یونہی اڑاتی رہی
کیا ہوگیا ہے مزنہ آہستہ چلائو میں گرجائوں گی۔
وہ اس بار جان کر اسکے کان پر چیخی۔۔ اسکے ڈرنے پر مزنہ محظوظ ہوکر بولی
واقعی؟ پھر تو مجھے اور رفتار بڑھانی چاہیئے ۔۔۔تم گرو ڈرو
تاکہ آئندہ یہ خرافاتی خیال نہ آئے کہ میں صبح صبح تمہیں ڈراپ کروں کالج ۔۔
وہ ہنس ہنس کر مزید ڈراتئ رہی۔ جیسے ہی کالج کے آگے اس نے بائک روکی کنزی نے اترتے ہی دھپ سے اسکے کندھے پر مکا مارا۔مزنہ ڈھٹائی سے ہنس کر اسے چڑاتی رہی۔ پھر جیب میں ہاتھ ڈال کر اسکے ہاتھ پر ہزار روپیہ بھی رکھ دیا۔ کنزی کی سب کوفت دور ہوئی کھلکھلا کر اسکو گلے لگاکر پیار کرتئ خداحافظ کہتی اندر بھاگی۔ اسکے بچپنے پر وہ بزرگانہ شفقت سے مسکرا کر سرجھٹکتی بائک نکال لے گئ۔ گیٹ سے اندر داخل ہوتے ہی سامنے اسکا گروپ کھڑا تھا وہ گرمجوشی سے انکو ہاتھ ہلاتے ہوئے انکی جانب بڑھنے کو تھی جب سینیئرز کا ایک گروپ اسے پکارنے لگا۔
اے اے کنزی۔ یہ کونسا کزن تھا تمہارا؟؟
فورتھ ائیر کی شمائلہ آنکھیں مٹکا مٹکا کر پوچھتی اسے ایکدم زہر ہی لگی۔
کونسا کزن ؟ وہ سمجھی نہیں۔
ارے وہی جس سے لپٹ کرپیار کرتی تم ابھی آئی ہو اندر۔
دوسری لڑکی نے عامیانہ انداز میں کہہ کر شمائلہ کے ہاتھ پر ہاتھ مارا وہ سب زور سے ہنس دیں۔۔
شٹ اپ۔ سوچ سمجھ کر بولا کرو ۔ وہ غصے سے زور سے بولی تو اسکی سہیلیاں بھی اسکی مدد کو دوڑی آئیں۔۔
ہم سوچ سمجھ کر بولا بھی کریں اور تم باہر بنا سوچے سمجھے گلے لگو گال سے گال ملائو۔
ایک اور لڑکی چمک کر بولی تو کنزی کی ساری مروت رخصت ہوئئ
خبردار جو ایک لفظ بھئ مزید بکواس کی تو منہ توڑ دوں گی۔ میں اپنی بہن کے ساتھ آئی ہوں بڑی بہن ہے وہ میری۔
اسکی طیش کے مارے آواز پھٹ سی گئ۔ ارد گرد لڑکیوں کی بھنبھناہٹیں بھی تھم سی گئیں
کیا ہوا کنزئ۔۔ اسکی سہیلی نے آکر اسے بازو سے تھاما۔۔ فرط طیش سے وہ کانپ رہی تھی
مگر ہم نے خود دیکھا وہ تو بالکل لڑکا۔۔۔۔ شمائلہ خود بھی اسکا ردعمل دیکھ کر گڑبڑا سی گئ
وہ مزنہ ہیں اسکی بڑی بہن ۔ وہ لڑکوں جیسی لگتی ہیں مگر بڑی بہن ہیں اسکی۔ کنزی کو کندھے سے تھام کر لیلی نے ان سب کئ غلط فہمی دور کرنی چاہی۔
واٹ ؟ مگر وہ تو بالکل لڑکا تھی۔ بالوں کی پونی تھی مگر وہ تو بالکل لڑکی نہیں لگتی۔۔۔۔
شمائلہ کی حیرت عروج پر تھی۔
توکیا ہوا وہ دراصل اسکا بھائیوں کی طرح ہی خیال رکھتی ہیں بس کپڑے مردانہ ہوتے ہیں انکے۔ہیں وہ لڑکی ہی۔
روبیہ نے بھی صفائی دینی چاہی۔
ہیں کنزی کی بہن ہے وہ؟ کنزی کو اپنی پشت سےحیرانی بھری آواز سنائی دی۔
ارے یار میں خود حیران ہوئی کنزی کو کیا ہوا کس طرح لڑکے سے گلے مل رہی ہے۔
بائیں جانب سے حیرت کا اظہار۔
بہن ہی ہے یا؟ نا بھائی نا بہن ؟ سرگوشی۔۔
جب وہ بہن ہیں تو بھائیوں کی طرح کی کیوں ہیں۔
شمائلہ اپنی حیرت پر قابو پا کر پوچھ رہی تھی۔
کنزی کی بہن تھئ۔۔
کنزی کا بھائی۔۔
آوازیں ہی آوازیں وہ دونوں کانوں پر ہاتھ رکھتی وہاں سے بھاگ اٹھئ۔ روبیہ اور لیلی بھی اسکے پیچھے دوڑیں مگر یہاں موجود مجمع ابھی بھی اس معمے کو حل کرنے میں مصروف تھا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یونیورسٹی کے احاطے میں بائک کھڑی کرکے وہ حسب عادت بائک پر لگے آئینے میں دیکھ کر بال سنوارنے لگی۔
ایک دو لٹیں ماتھے پر آن گری تھیں جنہیں اس نے لاپروائی سے سمیٹا تھا۔ انداز میں بے نیازی پنہاں تھی۔ بائک لاک کرکے یونیورسٹی کے احاطے سے لیکر ڈیپارٹمنٹ تک وہ کتنی ہی نظروں کے حصار میں رہی تھی۔ ماہا اورعادل کینٹین سے ہنستے بولتے باہر نکل رہے تھے۔ اسکی نگاہوں میں چمک سی آگئ۔ تیز تیز قدم اٹھاتی سیدھا وہ مکمل عادل کی جانب متوجہ ہنسی ہوئی ماہا سے جا لپٹی تھی
ماہا اپنی دھن میں چونکی مگر اسکا لمس محسوس کرتے ہی پہچان کر ہنس کر جوابا مڑ کر گلے لگ گئ۔
ہیلو میری جان۔مزنہ نے اسکے کان میں سرگوشی کی
کیسے ہو جانو آج تو بہت ہینڈسم لگ رہے ہو۔اس سے الگ ہو کر سرتاپا دیکھتے ہوئے وہ توصیفی انداز میں بولی۔۔
مزنہ ہنسی اور آگے بڑھ کرعادل سے بھی گلے لگنا چاہا مگر وہ سنجیدہ سا چہرہ بنا کر پیچھے ہٹ کر کھڑا ہوگیا
کیوٹ کہہ لو۔ لڑکیاں ہینڈسم نہیں ہوتیں۔
عادل نے اچٹتی سی نگاہ اس پر ڈالتے ہوئے جتانے والے انداز میں کہا ۔۔
ماہا اسکی بات پر ہنس دی اور پیار سے اسکو ساتھ لگا کر بولئ
یہ کہاں سے لڑکی ہے۔ یہ تو ماہی منڈا ہے۔ میرا پہلا بوائے فرینڈ یہی ہے۔۔
اسکی بات پر جو فخریہ مسکراہٹ مزنہ کے چہرے پر در آئی تھئ وہ جانے کیوں عادل کو بالکل پسندنہ آئی۔
یہ گرل ہے بوائے فرینڈ بس میں ہوں تمہاراتمہیں تو بلکہ اپنی سہیلی کو بھی اچھا سا بوائے فرینڈ ڈھونڈ نے میں مد دکرنی چاہیئے
عادل کی بات پر مزنہ کو اچھا خاصا برا لگا۔ تپ کر بولی
تم میری فکر مت کرو میرے لیئے ماہا ہی کافی ہےمجھے اسکے سوا کسی کی ضرورت نہیں ہے۔یہی میری فرینڈ بھی گرل فرینڈ بھی ۔۔
اسکا انداز عادل کو چیلنج دیتا ہوا لگا تو وہ بھی شرارت بھرے مگر جتانے والے انداز میں کہنے لگا
لڑکیوں کی گرل فرینڈ نہیں بوائے فرینڈ ہوتے ہیں۔ مزنہ بی بی۔۔ اور تم چاہے جتنا بھی حقیقت سے بھاگ لو رہوگی لڑکی ہی اور ایکدن تم نے بھئ لال جوڑا پہن کر رخصت ہونا ہے پیا سنگ۔
اسکے ہلکے پھلکے مگر جتانے والے انداز نے مزنہ کا دماغ کھولا دیا۔ سختی سے بولی
ایسا کبھئ نہیں ہوگا۔
ایسا ہی ہوگا ڈئیر۔ عادل نے مزید چڑایا
اسکی مسکراہٹ پر مزنہ کے تن بدن میں آگ سی لگ گئ
تم اتنے ان سیکیور کیوں رہتے ہو؟ مرد نہیں ہوکیا؟ ڈرتے ہو مقابلہ کرنے سے؟
مزنہ اسکو کندھے سے دھکا دیتے ہوئے بولی۔ قدمیں وہ بس دو ایک انچ ہی بڑا ہوگا پھر بھی یوں دھکا دیا تھا جیسے مسل ڈالے گی چٹکیوں میں۔ عادل کو اسکے دھکے سے ذیادہ جملے غصے میں لے آئے۔
مزنہ تم لڑکی ہو اسلیئے لحاظ کر رہا ہوں۔ تم حد سے گزر رہی ہو۔
عادل کا چہرہ یک لخت سرخ پڑا تھا تو مزنہ بھی لال بھبھوکا ہو چلی تھی ماہا گھبرا کر دونوں کے بیچ میں آگئ
گائز کیا ہوگیا ہے؟ ریلیکس؟ کس فالتوبحث میں الجھ رہے ہو؟
وہ بری طرح گھبرا گئ تھی
ماہا کو بیچ میں آتے دیکھ کر دونوں ٹھنڈے پڑے
عادل بالوں میں انگلیاں پھنسا کر خود کو شانت کرنے لگا تو وہیں مزنہ ماہا کو منصف بنا کر پوچھنے لگئ
میں الجھا ہوں ؟ یہ ہروقت الٹی سیدھی باتیں کرتا ہےمیں جو مرضی کروں اسے کیا۔میں لڑکا ہوں یا لڑکی اس سے ۔۔۔۔
تم لڑکی ہی ہو اور تمہیں کم از کم اب یہ بات خود کو باور کرالینی چاہیئے۔
عادل اپنا غصہ ہمیشہ کی طرح جھٹک کر دوبارہ اس سے مخاطب تھا۔انداز سمجھانے والا تھا مگر مزنہ کو طنز ہی لگا چٹخ کر بولی
تم پاکستانئ مرد ہو ہی میل شائونسٹ۔ کسی پروگریسیو (progressive)انڈیپینڈنٹ (independent) لڑکی کو دیکھتے ہو تو جل اٹھتے ہو اسے لیٹ ڈائون کرنے کو الٹی سیدھی
thats what you are.. larki…
وہ ذرا سا جھک کر اسکی آنکھوں میں جھانکتے ہوئے زور دے کر بولا
مزنہ نے اسے گھور پھر پیر پٹختی چلی ہی گئ۔ ماہا نے اسے روکنا چاہا
مزنئ ۔۔ مزنئ بات سنو رکو۔
مگر وہ رکی نہیں
ماہا نے گھور کر عادل کو دیکھا
تم کیا فضول بحث لیکر بیٹھ گئے۔ پتہ ہے نا اسے ایسی باتیں نہیں پسند خفا کردیا نا اسے۔ کبھی کبھی تو لگتا وہ بس میری دوست ہے۔۔۔
یہ فضول بحث نہیں ہے۔ دیکھو اسے ۔۔
اس نے تیز قدم اٹھاتی لمحہ بہ لمحہ دور ہوتی مزنہ کی جانب اشارہ کیا
کہیں سے نارمل لڑکی لگتئ ہے؟ اسے دوست سمجھا ہے جبھی چاہتا ہوں وہ نارمل لڑکی بنے۔ لڑکیوں جیسی چال ڈھال اپنائے انکے جیسے کپڑے پہنا کرے۔ یہ آئوں گا جائوں کرنے سے وہ لڑکا نہیں بن جائے گی۔ تمہیں اندازہ بھی نہیں ہے پیٹھ پیچھے لوگ کیسی باتیں کرتے ہیں اسکے بارے میں ۔پاگل سائیکو تک کہتے ہیں۔مجھے سمجھ نہیں آتا اسکے گھر والے سمجھتے کیوں نہیں اسکا مسلئہ؟ وہ۔خود کو لڑکی سمجھتی ہی نہیں ہے اور تمہیں بھی۔
غصے سے بولتے بولتے وہ ایکدم رکا۔
تم ۔۔ تم بھی نہیں سمجھاتیں اسے۔۔ وہ جھلا سا گیا تھا
ماہا اسکے چپ ہونے کا ہی انتظار کر رہی تھی۔
بول لیا اب میں بولوں؟
ماہا نے کہا تو وہ ہونٹ بھینچ کر دیکھنے لگا۔
تمہیں عجیب لگتی ہے کیونکہ تم نے اسے پچھلے سال دو سال سے ہی دیکھا یا جانا ہے۔ وہ میری بچپن کی دوست ہے۔ ہمیشہ سے ہی ایسی ہے۔اسے لڑکیوں والے شوق نہیں پھر وہ تین بہنیں ہیں انکے گھر کا باہر کا ہر کام یہی کرتی ہے تو تھوڑی سی مردمار ٹائپ ہے مگر یار ہمارا معاشرہ بھی تو دیکھو نا۔ ایسا اسے ہونا پڑا ہے۔بس اور۔۔
اسکی توجیہہ پر عادل بری طرح چڑ سا گیا
ہاں بس وہ ہے ایسی اسکا کچھ نہیں ہو سکتا۔میں تمہیں نہیں سمجھا پا رہا وہ کیا سمجھے گئ۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔
عادل سے منہ ماری کے بعد اسکا پھر موڈ خراب ہی رہا۔ اسکا موڈ ٹھیک کرنے کے چکر میں ماہا بھی عادل سے کھنچی کھنچی اسکے ساتھ ساتھ رہی مناتی رہی کینٹین میں اسکے ساتھ لنچ کیا۔ عادل کو شائد اتنی کوئی پروا بھی نہیں تھی۔ ویسے بھی اسکا ڈیپارٹمنٹ دوسرا تھا آرام سے گھر بھی چلا گیا۔ ہاں ماہا کے منانے سے اسکا موڈ بہتر ہوا اسے اپنی بائک پر خود گھر چھوڑ کر جب گھر جانے کا ارادہ باندھا تو تھکن کے مارے بیگ کا وزن ذیادہ محسوس ہوا۔ مگر ایک اور کام ابھی باقی تھا۔ اس نے گہری سانس لی اور بائک کا رخ حفصہ کے سسرال کی جانب موڑ دیا۔۔۔
حفصہ کے گھر میں غیر معمولی چہل پہل تھی۔ مین گیٹ کھلا ہوا تھا سو وہ آرام سے بائک کھڑی کرکے اندر چلی آئی۔ پانچ سالہ ساراکچھ بچوں کے ساتھ گیراج میں ہی کھیل رہی تھی۔ اسے دیکھ کر کھیل چھوڑ چھاڑ بھاگی آئی اور آکر لپٹ گئ۔
مانی آدئیں۔
اسکے پیار کے بے ساختہ اظہار پر اس نے بھی جھک کر اسکو گود میں اٹھا لیا
حفصہ نے مزنہ اور کنزی کو آنی کہلوایا تھا اس سے کنزی کو تو خیر کنزی آنی ہی کہتی تھی مزنہ اسکی زبان پر نہیں چڑھتا تھاسو وہ مزنہ آنی کو ملا جلا مانی کہنے لگی تھی اسے۔ اور اسے اسکے منہ سے اتنا پیارا لگتا تھا کہ کبھی تصحیح بھی نہیں کی۔
کیسا ہے میرا بیٹا ۔ وہ پیار سے اسکا گال چوم کر پوچھ رہی تھی۔ گلابی فراک میں وہ چھوٹی سی گڑیا لگ رہی تھی اسکی بات پر منہ بسورنے لگئ
میں نے نیکر پہننی تھی مما نے فراک پہنا دی گندا برا لگ رہی ہوں میں۔۔
اس نے اتنئ معصومیت سے شکایت لگائی کہ وہ ہنس دی
نہیں تو اتنی پالو لگ رہی ہے سارو۔۔ اس نے جھٹ گال چوم لیئے
مما سے کہو نا مجھے معاذ جیسے کپڑے پہننے۔۔
اس نے اشارے سے اپنے تایا ذاد بھائی کو دکھایا۔ حفصہ کے جیٹھ کے دونوں بیٹے ہی تھے بڑا آٹھ دس سال کا چھوٹا معاذسارا سے چند مہینے کے فرق سے ہی تھا۔ ان دونوں بچوں کے ساتھ کھیل کھیل کر اسکی ایسی خواہش عجیب نہ تھی۔ اس وقت تو خیر ان دونوں بھائیوں کے ساتھ دو تین او ربھی بچے ہی تھے اس وقت اسکو خوب حیرانی سے دیکھ رہے تھے۔
مانی آپ لڑکی ہو نا۔ معاذ بھی اسکے پاس بھاگا آیا۔
جی نہیں جی لڑکیاں تو ایسے کپڑے نہیں پہنتیں۔
ایک بچے نے اعتراض جڑا۔
یہ لڑکا ہیں انکے بس بال لمبے ہیں۔۔ میرے چاچو نے بھی بڑھائے ہوئے ہیں۔
دوسرا بچہ اسکی بات کاٹ کر بولااور بھاگا بھاگا اسکے پاس آیا
آپ لڑکا ہیں نا؟
اسکے ساتھ باقی بچے بھی تجسس میں کھنچے آئے۔۔
وہ گڑبڑا سی گئ۔ اتنے چھوٹے بچے تھے اوپر سے حفصہ کے سسرالی بھی ڈانٹ کر بھگا بھی نہیں سکتی تھی۔
مانی لڑکی ہی ہیں بس وہ لڑکوں جیسے کپڑے پہنتی ہیں۔
معاذ سے بڑے شاذ نے سنجیدگی سے جواب دیا۔
کیوں؟
بچے کا سوال تیار تھا۔
اس نے گڑبڑا کر سارا کو گود سے اتارا اور قصدا رعب سے بولی
کیا اتنئ گرمی میں باہر کھیل رہے ہو تم سب چلو اندر ۔۔
اسکے اچانک رعب میں بچوں نے تو کیا ہی آنا تھا الٹا برے برے منہ بنانے لگے
چلو بچو آجائو اندر کھانا لگ گیا ہے۔ تبھی حفصہ لائونج کا دروازہ کھول کر باہر جھانک کر بچوں کو بلانے لگی
اسلام و علیکم آپی
وہ گرمجوشی سے اسکی جانب بڑھی۔ حفصہ کی اس پر نظر نہیں پڑی تھئ اسے دیکھ کر گھبرا سی گئ۔ بچوں کو اندر جانے کا کہتی خود جلدی سے باہر نکل آئی
تم اس وقت خیریت؟ انداز میں گرمجوشی مفقود تھی۔ مزنہ کا جوش جھاگ کی طرح بیٹھنے لگا
ہاں وہ امی نے سوٹ منگوائے ہیں جو سل چکے ہیں۔۔
وہ بھی سنجیدہ سی ہوگئ
اچھا اچھا میں یہیں لیکر آتی ہوں۔
حفصہ نے کہا تو وہ اسکے ساتھ آنے لگی
تم یہیں رکو میں لا رہی ہوں۔ حفصہ نے سے روک ہی دیا
آپی پانی بھی پینا ہے مجھےاتنی دھوپ سے آرہا ہوں۔
مزنہ نے کہا تو وہ جانے کیوں جھلا سی گئ
اچھا پانی بھی لا دیتی ہوں یہیں رکو تم۔
وہ کہہ کر رکی نہیں تیزی سے اندر گھس گئ۔۔ چند ہی لمحوں میں وہ باہر بھی تھئ۔ شائد بھاگتی ہوئی گئ تھی اندر جبھی پانی لانا بھی بھول گئ۔ شاپر تھما کر بولی
یہ لو۔ امی سے کہنا ایک سوٹ ابھئ درزی نے واپس نہیں کیاوہ میں بعد میں بھجوا دوں گی اب تم جلدی سے گھر جائو عامر بوتل لینے گئے ہیں آتے ہوں گے تمہیں نہ دیکھ لیں۔۔
وہ جو پانی کا یاد دلانے لگی تھی اسکی ہدایت پر جھلا گئ
کیوں مجھے نہ دیکھ لیں۔میں کوئی بھوت ہوں جو مجھے دیکھ کر ڈر جائیں گے۔؟
حفصہ کی جان پر بنی تھی اسکی حجت پر چڑ ہی گئ
میری نند کے رشتے کیلئے لوگ آئے ہوئے ہیں نازک معاملہ ہے کوئی اونچ نیچ ہوئی نا سیدھا سارا الزام تم پر دھر دیں گے جانتی تو ہو عامر اور انکی اماں کا مزاج میں کوئی رسک نہیں لے سکتئ۔ اور یہ لو پیسے۔ باہر سے بوتل لے لینا پانی کی۔
اس نے دوپٹے کے کنارے سے بندھے پیسے نکال کر بڑھانے چاہے۔ ہتک کے احساس سے مزنہ کی پیشانی پر کئی بل آگئے۔ شاکی نگاہ سے اسے دیکھتی شاپر لیکر اسکا پیسے بڑھاتا ہاتھ نظرانداز کرتی باہر نکل گئ۔
حفصہ نے اسے پکارا اسکئ پیچھےگیٹ تک آئی مگر وہ لمحہ بھر بھی نہ رکی بائک نکال لے گئ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مکینک کو وہ واپسی پر ساتھ لائی تھی۔ موٹر اپنہ نگرانی میں ٹھیک کروا کر موٹر چلا کر تسلی کرکے جب لائونج کا دروازہ کھولا تو گرم تپتے چہرے پر ٹھنڈی ہوا کا جھونکا اسے بے تحشا تھکن کا احساس دلا گیا۔ لائونج نیم تاریک تھا یقینا امی اور کنزی سو ہی رہی ہوں گی۔ صبح ساڑھے سات کی نکلی اب ساڑھے پانچ بجے گھر میں واپس قدم رکھ پائی تھی۔ شاپر ابھی تک ہاتھ میں ہی تھے۔ وہ ٹھنڈی سانس بھرتے امی کے کمرے کی جانب چلی آئی۔کنزی شائد اسکے کمرے میں تھئ امی اکیلی بیڈ پر لیٹی تھیں۔یقینا سو ہی رہی ہوں گی۔ اس نےشاپر لا کر امی کے سرہانے رکھے اپنی جانب سے تو خوب احتیاط سے رکھے تھے مگر پھر بھی آہٹ سے انکی آنکھ کھل ہی گئ۔
آگیا میرا بیٹا۔ چلو منہ ہاتھ دھو لو میں روٹی ڈال دیتی ہوں۔
وہ فورا اٹھ کر بیٹھ گئیں۔
کنزی آگئ کالج سے۔ اس نے یونہی پوچھا۔۔
ہاں وہ تو ایک بجے تک آجاتی ہے۔ کھانا وانا کھا کر سو رہی ہے اٹھا دو اب اسے بھی پانچ بج رہے ہیں نماز وماز پڑھے۔
امی بیڈ کے نیچے سے چپل پیر سے نکالتے ہوئے بولیں۔ اس نے بس سر ہلا دیا۔ اورکمرے میں چلی آئی۔
کمرے میں ملگجا اندھیرا تھا۔ پردے وغیرہ کھڑکیوں پر ڈلے ہوئے تھے ہلکا ہلکا اے سی چل رہا تھا۔ کنزی چادر تانے بے خبر اسکے بیڈ پر سو رہی تھی۔ گرمی کے تھپیڑے کھانے کے بعد ایکدم ٹھنڈک نے اسکا دماغ سن سا کردیا تھا۔ کچھ سجھائی بھی نا دیا۔ بچ کر چلتے بھی بری طرح گھٹنا بیڈ سے ہی ٹکرا گیا۔
آہ۔ وہ گھٹنا سہلاتی وہیں بیڈ کے کنارے ہی ٹک گئ
بیڈ ہلنے سے کنزی کی فورا آنکھ کھلی۔
کون۔وہ آنکھیں کھول کر دیکھنے لگی۔ مزنہ نے جواب نہیں دیا تو فورا اٹھ کر لائٹ جلانے لگی۔
کیا ہوا چوٹ لگی ہے۔ اسے گھٹنا دباتے دیکھ کر وہ فورا پاس چلی آئی
مزنہ نے رخ پھیرنا چاہا مگر اسکی آنکھوں میں تیرتے موٹے موٹے آنسو اس سے چھپے نہ رہ سکے
بہت زور سے چوٹ لگی ہے۔ اس نے سہلاناچاہا مگر وہ جھٹکے سے اٹھ کھڑی ہوئی
جائو تم میرا کھانا یہیں لے آئو میں منہ ہاتھ دھو لوں ذرا۔۔
وہ تیزی سے کہتئ باتھ روم میں گھس گئ۔ خوب رگڑ رگڑ کر منہ دھویا چہرے پر دنیا جہان کی تھکن گردو غباروہ پانی بھر بھر کر منہ پر ڈالتی رہی۔ جانے کتنی دیر گزر گئ کہ کنزی نے گھبرا کر دروازہ بجا ڈالا
کیا ہوا رو رہی ہو؟ ذیادہ چوٹ آگئ ہے؟
اسکی تشویش پر اس نے خاصا بدمزا ہو کر دروازہ کھولا
کیا ہوا کہاں چوٹ لگی ہے؟
امی بھی پریشان کھڑی تھیں
ذرا سا ٹھوکر لگ گئ اس پر بیٹھ کر روئوں گا بھلا میں؟ وہ قصدا لاپروائئ سے کہتی ہوئی اپنے بیڈ کی جانب بڑھی۔
اس نے مجھے پریشان کردیا۔ امی نے جیسے سکھ کا سانس لیا
مجھے آکر کہتی یے مزنہ کو بہت زور سے چوٹ لگی ہے گھٹنے میں۔ اب باتھ روم سے نکل نہیں رہا رو رہا ہے یقینا
امی دوپٹے سے ہاتھ پونچھتئ اسکے برابر ہی آن بیٹھیں۔
بیڈ پر اسکا کھانا سجا ہوا تھا گرم گرم روٹی اور آلو گوشت۔
اسکی بھوک چمک سی اٹھی۔ ڈھیلے ڈھالے مردانہ کرتےکی آستین ذرا سا چڑھا کر وہ مکمل لاپروا سے انداز میں کھانے میں مگن تھئ
میں نے کہا تھا نکل نہیں رہی رو رہی ہوگی۔
کنزی چبا چباکر بولی۔
میرا بچہ سب کام کرکے آیا ہے جائو اسکے لیئے چائے بنا کر لائو۔ سر میں درد ہو گیا ہوگا۔ امی لاڈ سے اسکے بال سنوارنے لگیں۔
کنزی چڑ سی گئ۔
ہمیں ٹوکتی رہتی ہیں خود اسے بیٹا بیٹا کہتی رہتی ہیں۔ یہ بھئ بیٹی ہے کبھی اس سے بھی چائے بنوا لیا کریں۔۔
تھوڑی کڑک چائے بنانا۔۔ مزنہ نے اسے ہرگز چڑانے کو نہیں کہا تھا مگر اسکا جملہ جلتی پر تیل ڈال گیا تھا۔
آپکو اسکے لاڈ اٹھاناہے خود اٹھائیں۔مجھ سے مت اٹھوائیں۔
۔ میں کالج سے آتی ہوں تو اپنے لیئے روٹی بھئ خود ڈالتی ہوں اسے ٹرے میں لگا کر کھانا پانی دیتی ہیں اور۔۔۔
تم بھی پھر کسی دن بائک پر بنک ونک کے چکر لگائو بجلی گیس کا بل ٹھیک کروانے جائو مکیکنک کو بلا کر لایاکرو سودا سلف لانے کی ذمہ داری اٹھائو پھر مقابلہ کرنا۔ کبھی بھائی کی کمی کا احساس نہیں ہونے دیا مزنہ نے اس پر یہ حال ہے تمہارا
امی نے ایک نہ رکھی لتاڑ کر رکھ دیا۔کنزی مگر آج چپ ہونے والی نہ تھی۔فٹ سے بولی
بھائی کی کمی ہے امی ہماری زندگی میں۔بھائی نہیں ہے کوئی میرا اور یہ یہ سب کچھ کر کے بھی بھائی نہیں بن گئ ہے ہمارا اور دنیا میں کیا لڑکیاں یہ سب کام نہیں کرتیں وہ سب اسکی طرح کیا لڑکوں والے کپڑے پہنتی ہیں یا چال ڈھال بدل لیتی ہیں۔؟ آپکو احساس ہی نہیں ہے کہ اسکے اس حلیے کی بنا پر
بس کرو خاموش ہو جائو
مزنہ کے صبر کا پیمانہ لبریز ہوگیا۔۔ بھاری گمبھیر آواز میں وہ چلائی تو کنزی تو کنزی امی بھی ایکدم چپ سی ہو کر اسکی شکل دیکھنے لگ گئیں۔
……………………………
ختم شد۔۔۔
جاری ہے۔۔۔۔۔۔

سلام دوستو۔کیا آپ سب بھی کورین فین فکشن پڑھنے میں دلچسپی رکھتے ہیں؟
کیا خیال ہے اردو فین فکشن پڑھنا چاہیں گے؟
آج آپکو بتاتی ہوں پاکستانی فین فکشن کے بارے میں۔ نام ہے Desi Kimchi ..
دیسئ کمچی آٹھ لڑکیوں کی کہانی ہے جو کوریا میں تعلیم حاصل کرنے گئیں اور وہاں انہیں ہوا مزیدار تجربہ۔۔کوریا کی ثقافت اور بودوباش کا پاکستانی ماحول سے موازنہ اور کوریا کے سفر کی دلچسپ روداد
پڑھ کر بتائیے گا کیسا لگا۔ اگلی قسط کا لنک ہر قسط کے اختتام میں موجود یے۔۔