Category Archives: Zawwar Haider shamim poetry

غم کو نغمات بناتے گزری
درد کی دھوم مچاتے گزری

سوۓ ارمان جگاتے گزری
شوق کو شعلہ بناتے گزری

دل امیدوں سے بساتے گزری
جسے ویرانہ سجاتے گزری

منزل شوق کہیں ہوتی بھی
منزلوں خاک اڑاتے گزری

نوجوانی تھی کہ آنچل کی ہوا
ہوش میں آتے ہی آتے گزری

انھیں چھو آیی کہیں موج بہار
پھول ہی پھول کھلاتے گزری

نیند آئی نہیں یاد آئیے گئی
رات بھر جان جلاتے گزری

اب بھی فردوس تخیل ہے وہ عمر
جو تیرے درد کے ناتے گزری

از قلم زوّار حیدر زیدی شمیم

نہیں گلزار رضواں میرے دل کی سجدہ گاہوں میں

دیار مصطفے    شہر    مدینہ  ہے    نگاہوں  میں 

ہم ان کو وسعت کون و مکاں تک دیکھنے نکلے

خرد والے سمٹ کر رہ  گئے ہیں  خانقاہوں  میں 

جمال  بندگی  پوچھو  نگاہ   بندہ     پرور    سے

دمکتا ہے  نشان  سجدہ  نورانی   نگاہوں   میں

سمجھ بیٹھے   جنہیں   اہل خرد    معراج   انسانی 

ہم ایسی منزلیں دانستہ  چھوڑ آئے  ہیں  راہوں میں

مرا ایمان  کامل ہے  شفیع    روز    محشر    پر!

کوئی یونہی  نہیں یہ  پختگی  میرے  گناہوں میں

جبیں اس آستاں   پر دولت کونیں قدموں   میں 

غلامان  محمد  منتخب ہیں   کجکلاہوں    میں 

شمیم آقائے یثرب   رحمت اللعالمیں    ٹھہرے 

وگرنہ  کیا دھرا ےھا میرے نالوں میر آہوں میں

 از قلم زوار حیدر شمیم 

فکر و فن کا چراغ جلتا ہے
پہلے برسوں دماغ جلتا ہے

دل سلگتا ہے داغ جلتا ہے
سوچنے سے دماغ جلتا ہے

ایک امید ٹوٹتی بھی نہیں
دور دور ایک چراغ جلتا ہے

آپکو زحمت کرم بھی ہوئی
دل وہی با فراغ جلتا ہے

پھر شگوفے چمن چمن پھوٹے
پھر مرا داغ داغ جلتا ہے

ٹھہرو ، ٹھہرو ، ہواؤ ، طوفانو
دیکھو دیکھو چراغ جلتا ہے

اس نوازش سے دل کا حال نہ پوچھ
بارشوں سے یہ باغ جلتا ہے

از قلم زوار حیدر شمیم

آپ ہیں ،پھول ہیں ،چاندنی رات ہے
درد ہے ،اشک ہیں ،ہم ہیں برسات ہے

اشک پلکوں پہ، تاروں بھری رات ہے
وقت کی بات ہے ،وقت کی بات ہے

ڈھونڈ کر لاؤ دل کو کہاں گم ہے دل
درد کی بات ہے غم کی برات ہے

پیار کے خار زار ،اور پھولوں سے تن
اہل دل کے لئے جیت بھی مات ہے

دیکھنا مے نگاھو ، غزل پیکرو
سوز دل میں بھی ایک چیز ایک بات ہے

میری بربادیوں کے ، تماشائیو
یہ بھی دیکھو یہ سب کس کی سوغات ہے

چاندنی جگمگاتی حقیقت سہی
دن کی بات اور ہے رات پھر رات ہے …..

از قلم زوار حیدر شمیم

وہ جو تھوڑی سی سر کوۓبتاں گزری ہے 

کچھ گزرنے کی طرح عمر رواں گزری ہے 

با ہمہ   خانہ خرابی    و ہمہ  رسوائی 

وہ جو گزری ہے پھر ایسی بھی کہاں گزری ہے 

کچھ مجھے یاد تو آتا ہے کہ جادو نگہی

جب مرا عہد جوانی تھا تو ہاں گزری ہے 

دل کا وہ حال ہوا ہے غم محرومی سے 

تم سے ملنے کی مسرت بھی گراں گزری ہے 

دور رہ کر بھی گزرنے کو تو گزری اے دوست 

ہر نفس آہ بلب شعلہ بجاں گزری ہے 

از قلم زوار حیدر شمیم 

درد کی لو سے چراغاں لمحے
میری قسمت کے درخشاں لمحے

رقص فرما و غز لخوان لمحے
شوق رسوا کے فروزاں لمحے

رہ گیے زین میں گڑ کر جیسے
اچھے وقتوں کے وہ پراں لمحے

حاصل حسرت یک عمرعزیز
آج کے بے سرو ساماں لمحے

بن چلے ہیں وہی یادوں کے تنور
وہی گلزار و گلستان لمحے

جم بھی رہتے ہیں اجل کی صورت
سانس کی طرح پر افشاں لمحے

کسی ناکردہ گناہ کی پاداش
موسم گل میں یہ ویران لمحے

ہم تمنا سے نہیں باز آیے
ٹھہر ے حشر بد امان لمحے

از قلم زوار حیدر شمیم

اور کوئی صورت بھی نہیں ہے اور نہیں ضبط کا یارا بھی 

ہائے اسی نے توڑدیا دل جس نے دل سے چاہا بھی

کتنی ترقی کر گئی دنیا کر لو پیار کا سودا بھی

دل بھی خریدے جا سکتے ہیں ہاں ہوتا ہے ایسا بھی 

کچھ اپنی تقدیر کی گردش کچھ تدبیر کی خامی تھی 

پیار پہ کوئی الزام نہیں پیار برا بھی اچھا بھی 

عشق نہیں ،اچھا تو ہوس ہے جو ہے ایک حقیقت ہے 

لاکھ فسانوں پر بھاری ہے اپنی ہوس کا قصا بھی 

سیم و زر تو اپنی نظر میں ٹھہر سکے ہیں نہ ٹھہریں گے 

ہم تو ستارے توڑ کر لاتے کوئی ہمارا ہوتا بھی 

حسن نظر کا دھوکہ نکلا پیار فریب حرص و ہوس 

عقل ٹھکانے آگئی لیکن کچھ بنتا اس دل کا بھی 

آج کہیں کل اور کہیں ہے موج شمیم آوارہ 

وہ جو ہمارا ہو نہ سکا وہ ہو نہ سکے گا کسی کا بھی 

از قلم زوار حیدر شمیم