Category Archives: Zawwar Haider shamim poetry

بلا سے گھیر لیا اندھیروں بگولوں نے

مرے جنوں کو ہوا دی ہے چند پھولوں نے

خراب حال ہو تم بھی ، مگر نصیبوں سے

مجھے تو دن یہ دکھایا میرے اصولوں نے

بہار رنگ سمن زار ہے مری منزل

یہ بات الگ ہے کہ الجھا لیا ببولوں نے

بکھر گئی ہیں کیوں یونہی اتنی پنکھڑیاں

بھری بہار کو طعنہ دیا ہے پھولوں نے

چمن تلک تھی سب اہل چمن کی دلداریاں

قفس میں اس بندھائی ہے کچھ بگولوں نے

ہزار اصول ہوئے جذب شوق پر صدقے

ہزار نام دیے شوق کو اصولوں نے

وفا سے مضحکہ اہل جور بھی دیکھا

وفا کے نغمہ سراؤں نے دل ملولوں نے

از قلم زوار حیدر شمیم

نیت ہو ڈوبنے کی ، تو امکان نئے نئے 

اٹھتے ہیں ساحلوں سے بھی طوفان نئے نئے 

وحشت نئی نئی ، کبھی ارماں نئے نئے 

دل ہے تو دل بہلنے کے ساماں نئے نئے 

پیمانے ریزہ ریزہ ، خرابے کھنڈر کھنڈر 

اب ہیں بھری بہار کے عنوان نئے نئے 

ہاں یہ مقام ہے کہ چلیں چارہ گر کے پاس

دل ڈھونڈتا ہے درد کے ساماں نئے نئے 

غیروں کی دشمنی ہے بڑی عامیانہ چیز 

میری خرابیوں کے ہیں عنوان نئے نئے 

پینے کے بعد حضرت واعظ کا زور نطق

جسے ہوئے ہیں آج مسلمان نئے نئے 

ایک ترک  عشق پر ہی نہیں داستاں تمام  

دل ہے تو ٹوٹنے کے بھی امکان نئے نئے 

پھولوں کا شوق اور خار و شرار و برق 

ہمراہ درد آئے ہیں درماں نئے نئے

مستی بھری گھٹا نہ سہی ابر غم سہی

ارماں بہ خیر زیست کے ساماں نئے نئے 

آوارہ نکہتیں کبھی پابند خوش نوا 

کھلتے ہیں گل بنام بہاراں نئے نئے 

دشمن کا دل جلے کہ ہمارا لہو شمیم 

ہم ہیں تو روشنی کے بھی ساماں نئے نئے 

از قلم زوار حیدر شمیم

سچ کو سچ اور نہ بہانے کو بہانہ سمجھیں

تم  ستاؤ  ہمیں ہم جور زمانہ سمجھیں

غیر کو غیر یگانے کو یگانہ سمجھیں

یہ تو جب ہو کہ ذرا رنگ زمانہ سمجھیں

جھوٹ کو جھوٹ فسانے کو فسانہ سمجھیں

وہ بھی دن آئے کہ اسرار زمانہ سمجھیں

ہم تو انساں کو دکھی دیکھ کر ہنسنے سے رہے

آپ سمجھیں غم دوراں کو فسانہ سمجھیں

ہم ہیں جو دیتے ہیں آہوں کو ہنسی کا آہنگ

کم ہیں جو غم کو مسرت کا خزانہ سمجھیں

دھڑکنیں ہر دکھے دل کی ہیں میرے سینے میں

میں کہوں اپنی تو لوگ اپنا فسانہ سمجھیں

آپ اٹھائیں تو سہی درد کا پرچم لے کے

اہل دل جتنے بھی ہیں شانہ بشانہ سمجھیں

ہے مرا شعر مرے درد کی تصویر شمیم

آپ سے نوحہ ، کہ نعرہ ، کہ ترانہ سمجھیں

از قلم زوار حیدر شمیم

رباعی
ارمان کچلتے ہوۓ دل دکھتا ہے 
ایما ں بھی بدلتے ہوئے دل دکھتا ہے 

گل چاک بد اماں  ہیں انھیں کیا چھیڑوں 
غنچوں کو مسلتے ہوئے دل دکھتا ہے 

از قلم زوار حیدر شمیم

قطعہ 
وہم رنگیں سے لو لگاۓ ہوئے 
سوز دل کے دیے جلائے ہوۓ

چار و ناچار جی رہا ہوں میں 
ہر سہارے سے جی چرائے ہوۓ

انکی الفت کا بھی زمانہ تھا 
اب زمانہ ہوا بھلائے ہوئے

از قلم زوار حیدر شمیم

روح انقلاب 

مرے قدم  میں مے و تو و شباب کی روح 

ترا خیال ہے مرے خیال و خواب کی روح 

ہر انقلاب بہاراں تری نگاہ کے ساتھ

ترا شباب ہے کل عالم شباب کی روح 

گناہ شوق مسلسل سزا سے بے خبری 

شباب روح ہے انکی یہ ہیں شباب کی روح 

نہ چاہیے مجھے الطاف کی خنک بارش 

میں پا گیا ہوں تری گرمی عتاب کی روح 

ملا رہے ہیں نگاہیں فلک کے تاروں سے 

نہاں ہے خاک کے ذروں میں آفتاب کی روح 

یہ چرچے ہیں   کہ گیا   دور اضطراب مگر 

سکوں کی آڑ میں اب بھی ہے اضطراب کی روح 

بہار  تازہ  کی  آمد  کا  غلغلہ    بھی  ہے 

خزاں رسیدہ بھی ہے شبنم و گلاب کی روح 

ضیائی روپ میں خونخوار   ظلمتیں ! توبہ 

وہ ظلمتیں کہ لرزی ہے آفتاب کی روح 

تمیز ثروت و غربت کے کالے پردوں میں 

مچل رہی ہے نئی  صبح انقلاب کی روح 

ہر اک زرہ بے حس کو بخشتی ہے تڑپ 

بلند عزم ہے پستی میں آفتاب کی روح 

فنا نہ ہوگا مذاق بلند    پروازی 

بدل سکے گا نہ کنج قفس عقاب کی روح 

سنبھل کے دامن جرات نہ چھوٹنے پائے

سکوں میں ڈھال کے رہے گی اس اضطراب کی روح 

ضمیر روشن و فکر بلند و عزم صمیم 

انھیں میں چڑھتی ہے پاروں انقلاب کی روح 

از قلم زوار حیدر شمیم

تم سے پہلے کبھی شکوہ تھا نہ اب ہے کوئی 

میں جو برباد ہوا ہوں اسکا تو سبب ہے کوئی 

ہنس تو دیتے ہیں کئی جاننے والے ہم پر 

ورنہ مڑ کر بھی نہ دیکھیں تو عجب ہے کوئی 

آج پھر گم خرابات سے رقصندہ دلی 

آج پھر شہر میں تقریب طرب ہے کوئی 

اور ہیں جن کو مرے غم سے سروکار نہیں 

سن ترے آنکھ چرانے کا سبب ہے کوئی 

کوئی کھائے نہ ترس ہاتھ دعا کو اٹھے 

دوست جھجکے یہ سمجھ کر کہ طلب ہے کوئی 

پرسش حال ہے یا مجھ کو گمان گزرا ہے 

تم ہو ے ہمدمو یا خواب طرب ہے کوئی 

یہ سر آشفتہ سا ‘ وارفتہ سا ‘ گم سم سا شمیم 

یہ منجملہ ارباب ادب ہے کوئی 

از قلم زوار حیدر شمیم

وفا صرف قصے کہانی تلک ہے، وفا ایک نے در حقیقت نہیں کی 
ہوس  نے تقدس  کا روپ  دھارا کسی نے کسی سے محبّت نہیں کی 

کھلے زخم پھولوں بھری محفلوں میں ، جلے دیپ پلکوں پہ 
تنہائیوں میں 
گوارہ کیا سب بارے حوصلے سے ، تمہیں بھول جانے کی ہمت نہیں کی 

بہ زعم وفا یا بہ نام محبّت ستم بھی اک انداز جانا کرم کا 
انھیں ہم سے اب یہ شکایات ہی ہے کہ ہم نے کبھی کچھ شکایت نہیں کی 

محبّت کی راہوں میں کانٹے ہی کانٹے گلوں کے عوض ہم نے چھانٹے ہی کانٹے 
ہے زخموں سے سینہ گلستاں گلستاں ہواؤں بہاروں کی منت نہیں کی 

وفا کی تو کانٹوں کو دل سے لگایا خلش کو بھی خوشبو کی ہمسر بنایا 
گھڑی دو گھڑی کو جو دامن  سجا دیں کبھی ایسے پھولوں کی حسرت نہیں کی 

از قلم زوار حیدر شمیم