Monthly Archives: August 2023

پھرتیلی ہیروئن “

جہنمیلا نے “جھنڈے “کا “ڈنڈا “ نکال کر اس میں ابا کی دھوتی پھنسائی ( ابا کو نئی دھوتی سی کر پہنا دی تھی) اور پورے گھر کے جالے پلک جھپکتے صاف کردئیے جالوں میں بسی “مکڑیوں “کو اکٹھا کیا اور انھیں چھت پہ بنے اسٹور میں نئے جالے لگا کر “آباد “کیا ( رحمدل جو تھی) پورے گھر کی صفائی نپٹا کر ، صوفہ کور ، پردے ، بیڈ شیٹس فلور کشن کور سب تبدیل کردئیے میلے کپڑے دھو کر سکھانے ڈالے اور “دس منٹ “کے اندر ان سب کاموں سے فارغ ہوکر پہاڑ کی طرف دوڑ لگادی۔۔

پہاڑ سے اُس نے اپنے ہاتھوں سے لگائے پودینہ کے پودے سے ہرا دھنیا توڑا، ٹماٹر کے پودے سے مٹر جمع کئے اور آلو کی فصل کھود کے مرچیں نکالیں، پودوں کو “آبِ حیا “دیا

اب اس کے پاس دوڑنے کا وقت نہیں تھا مریخی کزن کسی بھی وقت پنہچ سکتا تھا اسلئیے” لُڑھکتی “ ہوئی زمین کی طرف آئی نیچے پنہچ کے مسکراتی ہوئی اٹھی کپڑے جھاڑے اور دوسرے پہاڑ کی طرف دوڑ لگادی جہاں جہنمیلا نے اپنے باپ سے چُھپ کے جانور پالے ہوئے تھے اسکی لاڈلی مرغی جہنمیلا کو چھری کے ساتھ دیکھ کے مسکراتی ہوئی اسکی طرف آئی اور اسکے ہاتھوں ذبح ہونے کے لئے ٹانگیں اٹھا کے لیٹ گئی

“جہنمیلا” کیا تم میری آخری خواہش نہیں پوچھو گی ؟ مرغی نے کہا ۔۔

کیوں نہیں میری جان سے پیاری ، ؟؟

جہنمیلا ، میں چاہتی ہوں کہ مجھے ذبح کرکے میری رانیں بھون کے اس مریخی شہزادے کو پیش کی جائیں جس کی آمد کی اطلاع تمہارے خاندانی کُتے نے جنگل کی آگ کی طرح پھیلائی ہے اور وہ میری ٹانگیں چبا چبا کے مجھے تباہ و برباد کردے ، لیکن ہوں “ بریسٹ پیس “ پہ شہزادے کی نظر نا پڑے اسُ پہ تمہارے “ تاڑو باپ کا ہی “حق “ہے اور میرے اندر پلنے والےمیرے محبوب کی نشانی ، میرے “انڈے “کو احتیاط سے نکال کر کسی اور مرغی کی “تشریف” کے نیچے رکھ کر سینچا جائے اور جب اسُ انڈے سے میرا چوزہ نکلے تو میں اس چوزے کے آنکھوں سے میں تمہارا اور تمہارے شہزادے کا دیدار کروں ۔۔۔

کیوں نہیں میری پیاری ۔۔۔ جہنمیلا نے ہچکیوں اور آنسوؤں کے بیچ ہامی بھری اور آنکھیں بند کر کے مرغی کی گردن پہ چھری چلادی ۔۔۔( عیدِ قرباں پہ قربانیاں کرکر کے ماہر قصائی بھی بن چکی تھی)

گوشت جمع کرکے ایک مرتبہ پھر لڑھکتی ہوئی نیچے پنہچی ( دوڑنے کا ٹائم جو نہیں تھا) کچن میں داخل ہوکر اس نے گھڑی کی طرف دیکھااسے ان سب کاموں کو سمیٹتے دو گھنٹے ہوگئے تھے اور ابھی عید کی نماز میں پورا “ آدھا” گھنٹہ باقی تھا ۔۔۔

وہ فوراً طبیلے کی طرف دوڑی اور شیر خُرمہ بنانے کے لئے بھینس کا دودھ نکالا بدودھ نکال کے بھینس کے چوڑے سینے پہ تنگ “ چولی” پہنائی (لنگوٹ وہ پہلے ہی پہنا چکی تھی)لیکن ان پُر مشقت دو گھنٹوں اور تھکا دینے والے معمولی کاموں کے دوران بھی وہ اپنے محبوب کی یادوں سے غافل نا ہوئی ۔۔۔ دھیمے دھیمے مسکراتی وہ اپنے محبوب کا برقی پیغام “ جہنمیلا ، میں تمہاری یاد میں مریخ کے کنارے خلا میں ٹانگیں لٹکائے بیٹھ جاتا ہوں اور میری نظریں دور کہیں زمین پہ تمہاری تلاش میں سرگرداں رہتی ہیں ، میں اوپر سے پان کی پچکاری سے زمیں پہ تمہارے گھر کی چھت پہ تمہارے لہراتے آنچل کا نشانہ لیتا ہوں اور تمہیں اپنی محبت کے لال رنگ سے رنگ دیتا ہوں تو تم مجھے اپنی پانچ انگلیاں ہتھیلی سمیت دکھاتی ، شرماتی نیچے کی طرف کیوں دوڑ جاتی ہو؟ کے بارے میں سوچتی ہوئی لال گُلال ہوتی ، سل بٹّا نکالنے لگتی ہے آخر کو محبوب کی پسند کے پکوان جو تیار کرنے تھے۔۔۔۔

Kesi lagi apko phurteeli heroin ki yeh qist? Rate us below

رومانٹک ناول “پھرتیلی ہیروئن پارٹ ۳”

کُتے نے “رفع حاجت “سے فارغ ہوکہ ٹانگ “نیچی “اور منہ “اوپر”کر کے دیکھا تو دیکھتا رہ گیا ،کُتے کی زبان مزید باہر نکل آئی اور (وہ مزید “کُتا “لگنے لگا )وہ کھمبا نہیں قدرت کا ایک شاہکار تھا چھ فٹ سے نکلتا دراز قد ، گھنگریالے سنہری بال جو پسینے کے باعث ماتھے پہ سلیقے سے چپکے تھے، انڈے سے بڑی آنکھیں اور دھوپ میں جھلسا ہوا سنہرا گلابی رنگ ، پیروں میں جمی چُو کے چمکتے جوتے، جن پہ جہنمیلا کے ہاتھوں کی تیار کردہ پالش چمک رہی تھی ، جہنمیلا کا ڈیزائن کردہ گُوچی کا ٹریک سوٹ اور کاندھے پہ لٹکتا جہنمیلا ایڈیڈاس کا تیار کردہ ایڈیڈاس بیگ ( پارٹ ٹائم برانڈ ڈیزائنر بھی تھی) ، وہ خود سے لاپرواہ و بیگانہ شخص ،

دراصل کتے نے “کھمبا “سمجھ کے جس پہ “مُوتا “تھاوہ تو مریخی شہزادہ تھاکتے نے شہزادے کو دیکھ کے “بھاؤ بھاؤ “ اور شہزادے نے کُتے کو دیکھ کے “موتی چھُو “کیا اور کتا ٹیاؤں ٹیاؤں کرتا گاؤں میں انجانے شہزادے کی آمد کا اعلان کرنے روانہ ہوگیا اور شہزادہ کھوجتی نظروں سے اپنی “ جہنمیلا” کے گھر کی تلاش میں یہاں وہاں نظریں دوڑانے لگا ، عید کی بھرپور گہما گہمی میں بھی لوگ رک رک شہزادے کو ٹکٹکی باندھے اور انگلیاں کلائی سمیت منہ میں دبائے دیکھ رہے تھے آخر کو مریخی کزن نے ہمت کرکے ایک پریشان خاتون سے پوچھا “ ماں جی، میری ماں کی سگی بہن اور جہنمیلا کی ماں کے شوہر یعنی میرے “خالو “جُمّن چچا کا گھر بتا سکتی ہیں ؟ اماں جو مریخی شہزادے کے حسن کی شوخی سے مرعوب ہوکے اپنی “ لیلیٰ” کے لئے اسُے داماد منتخب کرچکی تھیں، کے “ماں “کہنے پہ اور مچل گئیں ۔۔۔ ہاں بیٹا کیوں نہیں ، وہ جو گاؤں کا سب سے چمکتا گھر ہے جہاں گاؤں کا سب سے اونچا امرود کا درخت ، جس پہ لال ہرے سیب لٹکے ہیں “ وہ ہی جہنمیلا کا گھر ہے ۔۔ جانتے ہو اس گھر کی رنگائی پُتائی بھلے جہنمیلا نے کی لیکن وہ رنگ میری “ لیلی “ نے جنگل کے پچھواڑے بھٹی لگا کے تیار کئے ہیں مریخی شہزادے نے ایک لاکھ روپے نقد ، دو سنے کے کنگن اور ایک سو بیس گز کا مریخی پلاٹ ماں جی کو بطور شکریہ پیش کیا اور شرماتا ،مسکراتا جہنمیلا کے رنگین سپنے اپنی آنکھوں میں سجائے ، اس کے “خالی مگر رومانس سے بھرپور میسجز “، “شرارت سے پُر مہندی لگی ٹنڈ “اور “بنا کچھ کئے، شرم و حیا سے لال رُخسار “اپنی نظروں میں بسائے اپنے متوقع سسرال کی جانب روانہ ہوگیا اسکے نتھنوں میں دور سے ہی جہنمیلا کے ہاتھوں لگے امرود کے درخت پہ لٹکے سیبوں کی خوشبو گُھسنے لگی اور وہ ان سیبوں کا مینگو شیک بناکر پینے کے لئے مچلتا ، بھِنکتا تیز تیز دوڑنے لگا۔۔۔۔

جاری ہے ۔۔۔

Kesi lagi apko Phurteeli Heroin ki yeh qist? Rate us below

#پھرتیلی_ہیروئن_ناول

رومانٹک ناول “ پھرتیلی ہیروئن پارٹ ۲”
اسی پاکیزہ محبت کی “تیز دھوپ “جیسی “برستی بارشوں” میں “سُوکھتے “کب عید آگئی پتا ہی نہیں چلا ، ہوش تو جہنمیلا کو جب آیا جب اسکی خالی کی سگی بہن اور اسکے باپ کی بیوی یعنی اسکی “ماں “نے اسُے بتایا کہ آج چاند رات ہے اور مریخ پہ اسکے کزن کا “ مریخ پہ درخت لگاؤ مُلک بچاؤ پراجیکٹ “ مکمل ہوگیا ہے اوراس نے وہاں سے روانگی “پکڑ “لی اور وہ کل صبح بعد نماز عید ہمارے ساتھ ہوگا جہنمیلا پہلےمُسکرائی پھر شرمائی، اور پھر گھبرائی ،جہنمیلا کے مخروطی انگلیوں والے ہاتھ حرکت میں آئے اور وہ کل عید کی تیاریوں میں جُتنے کے لئے روانہ ہوئی
اسے نا صرف اپنا گھر ، بلکہ اپنا آپ اور اپنا گاؤں بھی اپنے مریخی کزن اور عید کی خوشی میں سجانا تھا۔۔۔ اس نے سب سے پہلے “چاند “(جو اسکے کزن نے تحفے میں بھیجا تھا)کو اپنی مانگ سے نکال کے “آسمان” پہ ٹانگا تاکہ سب کو “چاند رات “کی خبر ہو سکے اسکے بعد گاؤں کے ہر گھر میں جاکر چاند مبارک کا سلام پیش کیا،
سلامتی پنہچانے کے بعد اپنے گھر والوں کے کپڑے رنگائی کرنے بیٹھ گئی ، (کپڑے رنگے گیں تو سئیے گی نا )پچھلی اگست کی طرح جنگل سے پتے لا کے مہندی تیار کی ابا کی ٹنڈ چمکائی، اماں کو مہندی لگا کے پلنگ پہ بٹھایا ، بھائیوں کی حجامت کی ،پائپ لگا کے پورا گھر بہن بھائیوں اور بھینسوں سمیت “دھویا” ابا کی بھینسوں🐂🐂 سے دودھ نکال کے انکا دہی جمایا اور لنگوٹ سی کے بھینسوں کو پہنائے شرمیلی جو تھی منگیتر کے سامنے ننگی بھینسیں کیسے آنے دیتی ؟ ☺️☺️بہنوں کی ٹوٹی ہوئی سینڈلوں کی ٹُوٹی ہوئی ہیلز کو اپنی فیوی کول جیسی کارآمد تُھوک سے جوڑا پھر گرم موسم کی مناسبت سے اپنا مخملی پنک کلرکا گہرا لال سوٹ ، ہلکے سرمئی رنگے کے گہرے ہرے دوپٹے کے ساتھ جس پہ ہلکے گہرے نیلے اودے پھول چھپے تھے استری کرکے واش روم میں لٹکایا ، اس دوران وہ اپنے کزن کی حسین یادوں اور مدہوش سرگوشیوں میں کھوئی رہی جو میسج کی صورت وقتاً فوقتاً اسکا کزن کرتا تھا “میری جہنمیلا، “کتنا حسین سما ہوگا جب “!!! بس یہیں تک سوچ کی اسکے رخسار شرم وحیا کی لالی سے ہرےہوجاتے ہیں کہ اسے اچانک آگے کا میسج” جب میں تمہارا محرمِ زار بن جاؤنگا اور تمیں میت خانے لے جانے اور کفنانے دفنانے کا حق صرف مجھے حاصل ہوگا “ یاد آجاتا ہے وہ مزید کھلکھلاتی ، اٹھلاتی ، کچن کی طرف صبح کی تیاریوں کے لئے چل دیتی ہے ۔۔۔
جاری ہے

Kesi lagi apko Phurteeli Heroin ki yeh qist ? Rate us below

s

آپ سب کے بے حد اصرار پہ ایک نئی رومانٹک کہانی۔۔۔۔

‎اچانک سے لڑکی کے اپنے ایجاد کردہ فون پہ روشنی جگمگائی، اس نے دیکھا تو اس کے مریخ والے کزن کا میسج تھا، دل میں یکایک ایک انجانی خوشی و مسرت کا احساس ابھرا، اس نے میسج دیکھا “چاند سے پیاری لڑکی کو جشنِ آزادی مبارک”، میسج پڑھ وہ بے اختیار مسکرا اٹھی، اس کے مسکرانے سے ہونٹوں کے درمیان سے اس کے دانتوں کی جھلک نظر آئی، اس جھلک سے اس قدر روشنی پھوٹی کہ یکدم سے اس روشنی سے پورا گاوں جگمگا اٹھا، گاوں کے لوگ سمجھ گئے کہ “جہنمیلا ” مسکرا رہی ہے،

‎ اس نے موبائل جونہی رکھا تو بیٹری لو کی وارننگ آئی، “افففوہ گاوں کا ٹرانسفارمر تو پچھلے چھ دن سے خراب ہے، اب کل چودہ اگست ہے، کس طرح ہوگا سب کچھ”، وہ بہت حساس مزاج کی مالکہ تھی اسے خود سے زیادہ دوسروں کی فکر رہتی تھی، اسی کشمکش میں وہ جمپ لگا کر اٹھی اور بجلی کے مخملی پول پر چڑھ گئی۔
‎دو گھنٹے کی مسلسل جدوجہد کے بعد اس نے ٹرانسفارمر ٹھیک کر دیا۔
‎ گاوں کی بجلی بحال ہوگئی
‎اس نے گھر آکر شکرانے کے طور پہ 20 منٹ میں 200نفل ادا کئے۔۔
‎پھر جاکر اس نے اپنا موبائل چارجنگ پہ لگایا، جب تک موبائل چارج ہوتا اس نے سب بہن بھائیوں اور اپنے ابا کے ہرے اور سفید کپڑے سلائی کیے، ۔
‎ اس کی لمبی لمبی مخروطی انگلیوں پہ سلائی جچتی بھی بہت تھی، جونہی سب کے کپڑے اور گاؤں کے ہر گھر کی چھت پہ لہرانے کے لئے جھنڈے سلائی کرکے فارغ ہوئی تو اسے یاد آیا کہ اسے ابا کے سنگ مرمر جیسی ٹنڈ پر مہندی بھی لگانی ہے 😄وہ ایک چھلانگ لگاکر دوڑی اور گاؤں کے پیچھے جنگل سے مہندی کے پتے توڑ کے لائی پتے پراسس سے گُذار کے مہندی تیار کی اور پندرہ منٹ کے اندر
‎پہلے اس نے اپنے ہاتھوں پہ مہندی لگائی، ابا کی ٹنڈ رنگی اور مہندی لگا نے کے بعد اس نے اپنے چھوٹے بھائیوں کے بال کاٹے، وہ پارٹ ٹائم موچی جو تھی، اتنی دیر میں موبائل بھی چارج ہوچکا تھا، اس نے میسج کمپوز میں اپنے مریخ والے کزن کا نمبر لگایا، نمبر دیکھتے ہی اس کے رخساروں پہ حیا کی سرخی دوڑ گئی، میسج کمپوز کرتے ہوئے اس کے ہاتھ کانپ رہے تھے، دل زور زور سے دھڑکنے لگا۔۔ پھیپھڑے پھولنے لگے۔۔۔، اس نے اپنے کزن کو “خالی میسج” کیا کیونکہ وہ سمجھتی تھی کہ پاکیزہ جذبات کے اظہار میں الفاظ کی کھرچن ضروری نہیں ہوتی۔۔۔۔
اور اسی لئے اپنے مہندی لگے ہاتھوں کی جگہ ابا کی مہندی لگی ٹنڈ کی تصویر کزن کو روانہ کردی کیونکہ کے اسے کامل یقین تھا کہ اسکا دیوانہ اسکے ہاتھوں کی چُمی لیکر اسکی پاکیزہ محبت کو ناپاک کرنے کی کوشش ضرور کریگا
جاری ہے۔۔۔۔۔۔

Kesi lagi apko phurteeli heroin ki pehli qist? Rate us below

#پھرتیلی_ہیروئن_ناول